Abakandida 9 barimo Fayulu, Mukwege na Katumbi barahamagarira abaturage ba Congo kuza kwigaragambya nyuma y’itangazo ry’ibyavuye mu matora y’umukuru w’igihugu riri butambutswe uyu munsi.
Mu itangazo basohoreye i Kinshasa mu murwa mukuru wa RDC, barakangurira abaturage kwigaragambya nibumva hatangajwe ibirimo “uburiganya bw’amatora” cyangwa “kwibwa kw’amajwi”.
Ni mu gihe Komisiyo yigenga y’amatora (CENI) yemeje ko hateganyijwe gutangazwa kw’ibyavuye mu matora ya perezida uyu munsi saa munani z’i Kinshasa (ku gicamunsi).
Mu majwi y’agateganyo yamaze kubarurwa Perezida Felix Tshisekedi ari imbere. Abakandida batavuga rumwe n’ubutegetsi bavuga ko habayeho uburiganya muri aya matora.
Kugeza ubu, amajwi 17.835.571 avuye mu majwi yatanzwe ni yo amaze kubarwa mu matora ya perezida. Félix Tshisekedi yiganje n’amajwi 12.848.573, ni ukuvuga 72.04%, akurikirwa na Moïse Katumbi n’amajwi 3,375.220, ni ukuvuga 18.92%.
Martin Fayulu afite umwanya wa gatatu n’amajwi 979.376, ni ukuvuga 5.49%, akurikirwa na Adolphe Muzito n’amajwi 245.251, ni ukuvuga 1.38%, na Radjabho Tebabho n’amajwi 72.488, ni ukuvuga 0.41%
