Urukiko Rwisumbuye rwa Nyarugenge rwasubitse urubanza rwa Kazungu Denis yari kuburanamo kimwe mu byaha akekwaho birimo no gusambanya umugore, nyuma y’uko uregwa atabashije kuboneka ku cyicaro cy’Urukiko.
Ni urubanza rwari ruteganyijwe kuba mu gitondo cyo kuri uyu wa Gatanu tariki 05 Mutarama 2024 ku cyicaro cy’Urukiko Rwisumbuye rwa Nyarugenge i Nyamirambo rurimo n’umwe mubaregera indishyi.
Kazungu yagombaga gutangira kuburana mu mizi urubanza yarezwemo gusambanya umugore, ariko abari baje kumva uru rubanza, barategereza baramubura maze urukiko rwanzura ko urubanza rwa Kazungu Denis rusubikwa.
Uretse kuba Kazungu yagombaga kuburana uru rubanza aregwamo gusambanya umugore, yagombaga kuzasubira imbere y’Urukiko mu cyumweru gitaha tariki 12 Mutarama 2024, kuburana urundi rubanza aregwamo ibyaha binyuranye birimo n’ibishingiye ku mpfu z’abantu 14 biganjemo abakobwa akekwaho kwica, kubasambanya kugahato no kubambura.
Urukiko rwasubitse iburanisha ryari riteganyijwe kuri uyu wa Gatanu tariki ya 5 Mutarama 2024, biturutse ku busabe bw’Ubushinjacyaha kuko Kazungu yari afite imanza ebyiri muri uru rukiko basaba ko zahuzwa.
Kazungu yafashwe mu kwezi kwa Nzeri (9) umwaka ushize wa 2023 aho aregwa kwica abagore 13 n’umusore umwe mu bihe bitandukanye, bamwe imibiri yabo yasanzwe aho yari atuye yarayihambye akemerako abandi yabatetse akabarya.
Icyo gihe Kazungu yemeye ibyaha yarezwe byose, gusa abwira urukiko ko abo yishe yabishe kuko “bamwanduje SIDA kandi babishaka”, maze urukiko rumukatira gufungwa iminsi 30 y’agateganyo.
Gusa ubushinjacyaha bwasabye igihe ngo hakorwe iperereza ryimbitse no gushaka ibindi bimenyetso mbere y’uko urubanza rutangira kuburanishwa mu mizi.
Umucamanza uyu munsi yavuze ko ashaka ko urubanza mu mizi ruhuzwa n’urundi rw’uwo mukobwa wareze Kazungu kumusambanya ku ngufu.
Ubushinjacyaha kandi bwasabye ko izi manza zahuzwa, ku buryo Kazungu Denis yazaziburanaho icya rimwe kuko ziregwamo umuntu umwe, kandi zikaba zifitanye isano. Ni icyifuzo cyemejwe n’Urukiko Rwisumbuye rwa Nyarugenge, rusubika urubanza rwagombaga kuba uyu munsi, rurwimurira tariki 12 Mutarama 2024.
Ingingo ya 134 mu gitabo cy’amategeko ahana ibyaha mu Rwanda ivuga ko uhamwe n’icyaha cyo gukoresha undi imibonano mpuzabitsina ku gahato, ahanishwa igifungo kitari munsi y’imyaka icumi (10) ariko kitarenze imyaka cumi n’itanu (15) naho Ingingo ya 107 y’iri tegeko ivuga ko uwishe undi abishaka, akabihamywa n’urukiko, ahanishwa gufungwa burundu.
Rafiki Karimu
Rwandatribune.com
