Nyuma y’uko umukandida w’ishyaka Ensembre pour la Republique Moise Katumbi atsinzwe amatora, iri shyaka ryasabye ko amatora ya perezida wa repubulika yabaye kuwa 20 mutarama 2023 ateshwa agaciro kubera amakosa yayaranze.
Mu itangazo iri shyaka ryasohoye kuwa 06 Mutarama 2024 rishinja komisiyo y’igihugu yigenga y’amatora(Ceni) kuba yarakoze uburiganya mu matora ngo kuko imashini zari zagenwe mu gukoresha amatora zatwawe n’umukandida w’ihuriro rya Union Sacre maze bakajya gukorera amatora mu ngo zabo kugira ngo babone uko biba amajwi.
Iri shyaka rivuga ko bashingiye ku byabaye byose bidakurikije amategeko risaba ko aya matora yateshwa agaciro hagategurwa andi.
Iri shyaka kandi ryahamagariye imiryango mpuzamahanga n’ibihugu kutemera ibyatangajwe na Ceni kuko ari igisebo kuri demokarasi ya Repubulika iharanira Demokarasi ya Congo .
Iri shyaka ritangaje ibi mu gihe umukandida waryo yanze gutanga ikirego mu rukiko rurinda iremezo ry’itegeko nshinga ngo arusabe gutesha agaciro aya matora.
Twabibutsa ko bitewe n’uko amatora yabaye muri Repubulika iharanira demokarasi ya Congo yanenzwe cyane n’abatavuga rumwe n’ubutegetsi buriho muri Congo, abenshi bahuriye muri iryo tsinda ryo kurwanya ubutegetsi buriho, abari batanze kandidatire zo kujya mu nteko ishinga amategeko bamwe muribo bamaze gutsinda amatora, ariko Ceni igatangaza ko amajwi yabo agizwe impfabusa bashinjwa kuba baribye amajwi ndetse baragize n’uburiganya muri ayo matora ngo kuko bagiye batwara imashini z’itora mu ngo zabo maze bakitora bakoresheje abaturage bahaye ruswa.
Abasesebguzi ba politike bakaba bakomeza kwibaza ukuntu haseswa gusa amatora ya bamwe muba depite gusa mu gihe uburiganya bwabaye mu matora yose kuko amatora y’abadepite yabereye umunsi umwe n’aya perezida wa repubulika.
Iri shyaka risabye ko aya matora yateshwa agaciro mu gihe urukiko rurinda iremezo ry’itegeko nshinga ruri gusuzuma ibirego by’abakandida babiri barusabye ko itsinzi ya Perezida Tshisekedi yateshwa agaciro.
Mucunguzi obed
Rwandatribune.com
