Urukiko rurengera Itegeko Nshinga mu gihugu cya Repubulika ya Demokarsi ya Congo, rumaze gutangaza k’uburyo budasubirwaho ko Perezida Félix Tshisekedi, ariwe wegukanye intsinzi mu matora aheruka kuba muri Repubulika ya Demokarasi ya Congo.
Ibi byatangajwe ku mugoroba wo kuri uyu wa 09 Mutarama 2024. Amatora yo muri Repubulika ya Demokarasi ya Congo, yabaye mu gihugu hose, haba ku mwanya w’Abadepite ndetse no ku rwego rw’Umukuru w’Igihugu, ku itariki ya 20 Ukuboza 2023.
Kuwa 31 Ukuboza 2023, Komisiyo y’igenga ishinzwe gutegura amatora (CENI) yatangaje amajwi y’amateganyo, itangaza ko Perezida Félix Tshisekedi yatsinze ku majwi 73,47, mu gihe Moïse Katumbi we yaje ku mwanya wa kabiri afite amajwi 18%, naho Martin Fayulu akaza ku mwanya wa Gatatu afite amajwi 4,9%.
Ibi urukiko rurengera Itegeko Nshinga rwo muri Repubulika ya Demokarasi ya Congo, rwabitangaje mu gihe abatavuga rumwe n’Ubutegetsi bakomeje kugaragaza ko ibyavuye mu matora ko bigomba kuba imfabusha hakongera kuba amatora bundi bushya.
Moïse Katumbi, kuri uyu wa Kabiri, yatangaje ko nta kindi kintu gikenewe usibye ko amatora yongera gusubirwamo, kandi ko amatora yabaye ateye isoni, bityo ko uwari uhagarariye Komisiyo y’igenga ishinzwe gutegura amatora CENI, agomba kwegezwa akanafungwa.
Adeline Uwineza
Rwandatribune.Com
