Perezida Mushya wa Kenya Dr William Samoei Ruto ategerejwe mu ruzinduko rw’akazi i Kampala muri Uganda mu ntangiro z’Ukwakira 2022, rukaba arirwo ruzinduko rwa Mbere azaba agiriye hanze ya Kenya kuva yatorerwa kuyobora Kenya.
Ibitangazamakuru byo muri Uganda byanditse ko uretse kugirana ibiganiro na mugenzi we Yoweri Museveni, Dr Ruto azitabira imurikagurisha ry’abanyenganda rizaba riba ku nshuro yaryo ya 28.
Umuyobozi w’Urugaga rw’abanyenganda runasanzwe rutegura iri murikagurisha, Bwana Daniel Birungi yemeje aya makuru, avuga ko muri gahunda yabo,bemeje ko Perezida Ruto ariwe uzafungura iri murikagurisha naho Perezida wa Uganda Yoweri Kaguta Museveni ayobore ibirori byo kurisoza ku mugaragararo.
Ubusanzwe Dr Ruto na mbere y’uko atorerwa kuyobora igihugu cya Kenya, yari afitanye ubucuti n’igihugu cya Uganda by’umwihariko Perezida Museveni afata nka se wo mu batisimu muri Politiki, dore ko no mu mwaka 2021 ubwo yari amaze gushyamirana n’uwari Boss we, Uhuru Kenyatta yashatse kujya kugisha inama Perezida Museveni ariko urugendo rwe rukaburizwamo n’inzego z’umutekano za Uganda ageze ku kibuga cy’Indege cya Jomo Kenyatta mu murwa mukuru Nairobi.
