Imfungwa yakatiwe urwo gupfa yo muri leta ya Alabama muri Amerika isigaje amasaha make kugira ngo ibe iya mbere igiye kwicwa hakoreshejwe umwuka wa Nitrogen nyuma y’uko atsinzwe mu rubanza yari aherutse kujuririra.
Kenneth Eugene Smith niwe utegereje kwicwa kubera ubwicanyi yahamijwe n’urukiko ko yakoze mu mwaka w’ 1988. Urukiko rw’ikirenga n’urukiko rw’ubujurire bakaba baranze guhagarika icyo abanyamategeko ba Kenneth Eugene Smith bita igihano cy’ubugome budasanzwe.
Eugene Smith w’imyaka 58, mu 1989 yahamwe n’icyaha cyo kwica Elizabeth Sennett wari umugore w’umuvugabutumwa, nk’uwishyuwe kugira ngo amwice.
Kwica uyu mugabo biteganyijwe uyu munsi kuwa kane muri leta ya Alabama hifashishijwe Umwuka wa nitrogen uza guterwa mu mubiri we biciye muri ‘mask’ mu gihe cy’iminota 15.
Eugene Smith araba abaye umuntu wa mbere wishwe hakoreshejwe buriya buryo muri Amerika, ndetse n’uwa mbere ku isi nk’uko bivugwa n’ikigo Death Penalty Information Center.
Abanyamategeko b’iyi mfungwa – yakatiwe urwo gupfa kuva mu 1996 – babwiye BBCdukesha iyi nkuru ko kuwa gatatu nijoro hatanzwe ubundi bujurire mu rukiko rw’ikirenga ku rwego rw’igihugu bizeye ko cyahagarika iki gihano cyaburaga amasaha 11.
Mu myaka ibiri ishize, Alabama yagerageje kwica uyu mugabo hakoreshejwe urushinge rw’ingusho, ariko biranga nyuma y’uko abo kurumutera babuze umutsi mbere y’uko icyemezo cya leta cyo kumwica gita agaciro saa sita z’ijoro.
Eugene Smith yari umwe mu bagabo babiri bahamwe no kwica Elizabeth Sennett wari ufite imyaka 45 bakishyurwa $1,000 n’umugabowe w’umuvugabutumwa wari warazonzwe n’amadeni akabikora agamije kubona amafaranga y’ubwishingizi tariki 18 Werurwe 1988.
Mu rubanza rwe, Eugene Smith yemeye ko yari ahari ubwo Elizabeth yicwaga, ariko avuga ko atigeze akora ku wishwe mu gikorwa nyirizina cyo kumwica.
Komiseri mukuru w’uburenganzira bwa muntu wa Amerika yavuze ko kwicisha Eugene Smith umwuka wa Nitrogen byaba bigize iyicarubozo, ubugome, no kutagira ubumuntu, asaba ko bihagarikwa.
K’uruhande rw’abunganira Smith kandi narwo rwaregeye ko kumwicisha Nitrogen binyuranyije n’amategeko ya Alabama, ariko kuwa gatatu nanone urukiko rwanze ubusabe bw’uyu mugabo ko hakoreshwa urushinge rw’ingusho mu kumwica aho gukoresha iyo uwo mwuka.
Abanyamategeko be bavuga ko uburyo bwo gukoresha Nitrogen ari “bushya kandi butageragejwe”, bukazatuma apfa nabi anigwa kandi aruka.
Umushinjacyaha wa leta Steve Marshall mbere yise ubu buryo ko “bushobora kuba ari bwo bwa kimuntu kurusha ubundi bwose mu kwica”.
Kubera ko imiti yica itewe mu rushinga yagiye igorana kubona, Alabama n’izindi leta ebyiri ubu zemeje gukoresha umwuka wa Nitrogen hypoxia nk’indi nzira yo kwica abakatiwe urwo gupfa mu buryo bworoshye.
Alabama ni leta ifite umubare munini w’abahabwa iki gihano muri Amerika, kandi ubu ifite abantu 165 katiwe igihano cyo gupfa bategereje kugihabwa.
Rafiki Karimu
Rwandatribune.com
