Umuyobozi w’akarere ka Rubavu Prosper Mulindwa yagaragaje uburyo leta ya Habyarimana Juvenal ariyo yateguye jenoside yakorewe abatutsi mu mwaka w’ 1994 ikanayishyira mu bikorwa, asobanurira urubyiruko ko leta iyobowe na RPF inkotanyi iri maso mu gukumira no guhana icyaha cya jenoside, ko nabo nk’abayobozi bazakomeza kubaha inyigisho zose zikenewe ku mateka yaranze igihugu.
Yagaragaje uburyo mu gihe cya jenoside yakorewe abatutsi hariho zone turquoise, abafaransa bakagira uruhare mu guhungisha abakoze jenoside kugira ngo bazagaruke guhungabanya ubusugire bw’igihugu cy’u Rwanda. Atanga n’urugero ko mu mwaka w’1997 abacengezi bagarutse muri aka karere ka Rubavu guhungabanya umutekano kubera guterwa inkunga n’abafaransa.
Yakanguriye urubyiruko kugira uruhare mu kubaka igihugu no gutanga amakuru yose yahungabanya akarere n’igihugu muri rusange. Urubyiruko rwaje ruhagariye urundi rwagagaje ko rwiteguhe guhangana n’abahakana banapfobya jenoside yakorewe abatutsi, kandi ko biteguye gusigasira politike ya “Ndi umunyarwanda”, ko ntacyo bagira urwitwazo baba mu bahungabanya ubumwe bw’abanyarwanda, baboneraho gusaba ubuyobozi bw’akarere kuzongera kubafasha gusura ingoro iranga amateka yo kubohora igihugu.
Mucunguzi Obed
Rwandatribune.com
