Urukiko rw’i Kinshasa kuri uyu wa Mbere rwahanishije igifungo cy’amezi atandatu umunyamakuru Stanis Bujakera Tshiamala, bivuze ko ahita afungurwa uyu munsi kuko ayo mezi yari ayamaze muri gereza.
Bujakera yatawe muri yombi muri Nzeri 2023 ashinjwa gukwirakwiza ibihuha ku rupfu rwa Cherubin Okende wari Umudepite, waguye i Kinshasa muri Nyakanga.
Yarezwe gukwirakwiza amakuru atari ukuri ajyanye n’urupfu rwa Okende. Bujakera yakomeje guhakana ibyo aregwa.
Bujakera yarezwe kwandikira Jeune Afrique inkuru ishinja ba maneko wa Congo kwica Okende, amezi arenga gato atatu mbere yuko haba amatora ya perezida yatsinzwe na Félix Tshisekedi wari usanzwe ku butegetsi.
Okende yahoze ari Minisitiri wo gutwara abantu n’ibintu, yegura mu Kuboza (12) mu 2022. Ubwo yapfaga yari umudepite akaba n’umuvugizi w’ishyaka Ensemble Pour La République rya Katumbi.
Mu iburanisha, ubushinjacyaha bwari bwasabiye Bujakera igifungo cy’imyaka 20 n’ihazabu 7500$.
Kuri ubu yakatiwe igifungo cy’amezi atandatu n’amande y’amadolari 400.
Uyu munyamakuru asanzwe akorera Jeune Afrique na Reuters ndetse n’ikinyamakuru Actualité.CD.
