Perezida Evariste Ndayishimiye yasabye umuryango w’abibumbye, guhagurukira imitwe y’iterabwoba iba mu karere

Mu ijambo umukuru w’igihugu cy’u Burundi yagejeje kubari bitabiriye inama rusange ya 77 y’umuryango w’abibumbye UN, yasabye ko umuryango w’abibumbye ukwiriye gushyigikira ibihugu byo mu karere k’ibiyaga bigari, mukurwanya ibikorwa by’iterabwoba bikomeje kwigaragaza muri aka karere.

Yagaragaje ko murwego rwo gushaka igisubizo cy’iki kibazo, uhereye kugihugu cye aherutse kohereza ingabo  muri Repuburika iharanira Demukarasi ya Congo, kugirango bafashe igihugu cya Congo kurwanya imitwe y’iterabwoba ibarizwa muri Kivu y’amajyepfo,  nk’uko hari abandi biyemeje kuzabafasha kugarura amahoro mutundi duce. ibi bikaba bikubiye mu masezerano aherutse kubera I Nairobi muri Kenya .

Uyu muyobozi yaboneyeho gusaba abakuru b’ibihugu bigize umuryango w’abibumbye gushyigikira aya masezerano, kugira ngo hashyigikirwe ibikorwa by’abagize umuryango w’Afurika y’iburasirazuba EAC muri gahunda bihaye yo gushakisha ibisubizo , mukurandura ibibazo by’umutekano muke ubarizwa mu karere by’umwihariko muri DRC.

Perezida Ndayishimiye yagaragaje ko nk’ibihugu byo mu karere biyemeje kurwanya imitwe y’iterabwoba ibarizwa cyanecyane muri Repuburika iharanira Demukarasi ya Congo.

Muri Repuburika iharanira Demukarasi ya Congo habarizwa imitwe myinshi yitwaje intwaro, harimo n’iyashyizwe mu rwego rw’imitwe y’iterabwoba, aha twavuga nka FNL umutwe ukomoka mugihugu cy’u Burundi, ADF umutwe uvugako urwanira amahame ya Kisiramu ukomoka muri Uganda, FDL R umutwe urwanya Leta y’u Rwanda, M23 hamwe n’indi mitwe nka CODECO n’iyindi.

Ibi rero bituma mu karere hataboneka amahoro kubera iyo mitwe itandukanye, kandi imyinshi ihitana ubuzima bw’abasivili umunsi k’uwundi, bigatuma mu karere hatajya haboneka amahoro nk’uko byagarutsweho n’uyu mukuru w’igihugu cy’u Burundi.

Umuhoza Yves