Moïse Katumbi Chapwe wahoze ari Guverineri w’i Ntara ya Katanga, yatangaje ko igihugu cya Repubulika ya demokarasi ya Congo kiri mu bihe biteye ‘agahinda.’
Nibikubiye mu butumwa bw’inyandiko Moïse Katumbi Chapwe aheruka gushira hanze, avuga ko ‘igihugu kiri mu bihe bibabaje’ anashinja minisitiri w’imari kuba yararenze kwitegeko ryerekeye amasoko atangwa na leta, akarekura amafaranga byihuse.
Yagize ati: “Igihugu cyacu kiri mu bihe bibabaje; mu kurenga kubiteganywa n’amategeko agenga amasoko ya leta. Minisitiri w’imari atanga miliyoni 400 z’amadolari ku mariba 1000 gusa.”
Yakomeje agira ati: “Ibi mbifitemo ubumenyi, ikigereranyo kimwe kiri munsi ya 20.00$, ubwo amafaranga ajya he? IMF na Banki y’Isi, ku ki bacecetse kuri aya mahano. amafaranga agaragara ko anyerezwa ashobora gufasha miliyoni y’abenegihugu b’iki gihugu.”
Katumbi kandi yavuze ko igihugu gikwiye kubona ubufasha kugira ngo kigere ku miyoborere myiza.
Ibi biri mu byatumye Moïse Katumbi ejo hashize yimwa uburenganzira bwo gusohoka igihugu aho yarashaka kwerekeza i Caïro muri Misiri mu mukino TP Mazembe iri bukine wo kwishura muri 1/2 mu gikombe cya CAF.
Nk’uko amakuru avuga nuko Moïse Katumbi yimwe uburenganzira bwo gusohoka igihugu n’ubuyobozi bushinzwe ibibuga by’indege muri Repubulika ya demokarasi ya Congo.
Ay’a makuru kandi avuga ko Moïse Katumbi yari ashaka gusohoka igihugu akoresheje indege ye bwite.
Biteganijwe ko ikipe ya TP Mazembe ikina uyu munsi tariki ya 26/04/2024. Ikaba izaguhatana na Al Ahly Sc mu mukino wo kwishura. Umukino ubanziriza uyu amakipe yombi yari yanganyije (ubusa ku busa).
MUKAMUHIRE Charlotte
Rwandatribune.com
