Mu ijoro ryo kuri iki Cyumweru tariki ya 21 Nyakanga 2024, Perezida wa Leta Zunze Ubumwe za America, Joe Biden wari umaze iminsi asabwa guhagarika gukomeza urugendo rwo guhatanira indi manda kubera izabukuru, yafashe icyemezo cyo kubihagarika.
Perezida Joe Biden yabanje kugaragariza Abanyamerika ko buri kimwe kijyanye n’ubusugire bw’igihugu ayoboye gihagaze neza haba mu bukungu ndetse n’ububanyi n’amahanga.
Ni icyemezo gikubiye mu itangazo Joe Biden yashyizwe hanze, amenyesha Abanyamerika ko yahagaritse urugendo rwo gukomeza guhatanira kubayobora.
Ni nyuma y’igihe Joe Biden abisabwa n’abarimo abo mu ishyaka rye, kubera izabukuru zakomeje kugaragaza ko afite intege nke, haba iz’umubiri ndetse no mu bitekerezo, mu gihe we yavugaga ko agifite imbaraga.
