Ubwato MV MERDI bwabanje guhengama mbere y’uko burohama, abarokotse bavuga ko bwari butwaye abantu n’ibintu birenze ubushobozi bwabwo
Ubwato MV MERDI bwabanje guhengama mbere y’uko burohama, abarokotse bavuga ko bwari butwaye abantu n’ibintu birenze ubushobozi bwabwo.
Umukuru wungirije w’intara ya Kivu ya Ruguru yavuze ko iperereza ku cyateye iyi mpanuka yahitanye abantu nibura 28 rigikorwa, ariko abari baburimo ntibashidikanya ko ari ukurunda abantu amagana mu bwato butwara abantu 50.
Abarokotse iyi mpanuka ni abantu 58 nk’uko byavuzwe na komiseri wa polisi Ekuka Lipopo, Visi Guverineri w’Intara ya Kivu ya Ruguru, mu gihe yemeza ko abapfuye ari 28. Ibiro ntaramakuru Reuters bivuga ko abapfuye ari 78.
Amasoko atandukanye avuga ko ubu bwato bwarimo nibura abantu barenga 300, Jean Jacques Purisi umwe mu bategetsi muri iyi ntara yabwiye ibiro ntaramakuru Reuters ko ubwo bwato bwari burimo abantu 278.
Ikinyuranyo cy’abatangajwe bapfuye n’abarokotse gisobanuye ko hari abantu hafi 200 cyangwa barenga bashobora kuba batikiriye muri kuriya kubirinduka k’ubwato bwari bugeze muri metero zisaga 500 gusa ngo bugere ku cyambu.
Inzira y’amazi ubu ni yo ishoboka mu guhuza uduce twera ibihingwa cyane twa teritwari z’intara ya Kivu y’Epfo na Goma, nyuma y’uko inzira z’ubutaka z’ingenzi zinjira mu mujyi wa Goma zigenzurwa n’umutwe wa M23.
Ubu bwato bwari buvuye ku cyambu cya Minova bwikoreye cyane cyane ibiribwa n’ibindi bicuruzwa bijyanywe ku masoko y’i Goma.
Ibiro bya Perezida wa DR Congo bivuga ko iyi nzira y’amazi ari yo abaturage ubu bahitamo kugira ngo ntibace ahafashwe na M23.
Bahati Selemani, umukozi ku cyambu wagize uruhare mu butabazi, yabwiye ibiro ntaramakuru Associated Press ibyo yabonye.
Ati: “Twabonye ubwato butangira kubirinduka. Twabonye ko ubwato bwari bwuzuriranye kandi hari imihengeri ikomeye.
“Nyuma ubwato bwatangiye guhengama gahoro gahoro. Abari bari hejuru batangiye kwijugunya mu mazi. Nuko ubwato burabirinduka burarohama”.
Alfani Buroko Byamungu w’imyaka 51, yari muri ubu bwato, yarokowe no kuba yarabashije koga kugeza ubwo abatabazi bamugezeho, ahita ajyanwa mu bitaro.
‘Nabonye abana n’ababyeyi barohama’
We yabwiye ibiro ntaramakuru Reuters ko amazi atari afite umuhengeri ukabije, ahubwo impanuka yaba yatewe no gupakira ubwato birengeje ubushobozi bwabwo.
Ati: “Nabonye abantu barohama, benshi bamanutse hasi. Nabonye abagore n’abana barohama, nanjye ubwanjye habuze gato ngo ngende, ariko Imana yamfashije.”
Undi mugore warokotse witwa Perusi Mukembale, yabwiye BBC ko “twari abantu amagana mu bwato bujyamo abantu nka 50”, avuga ko asanzwe akora izi ngendo.
Ati: “Twari benshi cyane, birashoboka ko twari turenze ibisanzwe kuko ubundi ngenda na buriya bwato nibura rimwe mu cyumweru. Tuba turi benshi, ariko iyi nshuro byari birenze.”
Makembale avuga ko yari azanye imyumbati ku isoko ry’i Goma ayivanye i Monova, ariko ubu ashima Imana ko yageze i Goma ari muzima.
Ati: “Uko ubwato busatira inkombe twatangiye kumva buta ‘equilibre’, bugenda buhengama gacye gacye. Abantu batangira gusenga, abandi bavuga ngo nitujugunye ibintu biremereye mu mazi.
“Uko bwigira imbere ibintu byarushagaho kumera nabi, abana bararira, ababyeyi baraboroga, abantu barasenga ariko ubwato bukomeza guhengama, mu mwanya muto buba burabirindutse.
“Narokowe no gufata urubaho ntazi aho rwavuye, kugeza abatabazi bangezeho. Ni Imana”.
