Indwara itaramenyekana imvo n’imvano yayo yadutse muri Repubulika Iharanira Demokarasi ya Congo imaze kwivugana abantu 79 nk’uko byemejwe na Guverinoma y’icyo gihugu mu itangazo yasohoye ku itariki 4 Ukuboza 2024.
Nk’uko iryo tangazo ribisobanura abari guhitamwa cyane niyo ndwara, ni abana bafite hejuru y’imyaka 15 y’amavuko, kugeza ubu abantu bagera kuri 376 bakaba ari bo bamaze kwandura iyo ndwara itaramenyekana neza.
Ku Cyumweru tariki 10 Ugushyingo 2024, ni bwo hatangajwe abantu ba mbere bahitanwe n’iyo ndwara itaramenyekanabakaba barapfiriye mu Karere k’ubuzima ka Panzi, muri Teritwari ya Kasongo -Lunda.
Abafashwe n’iyo ndwara, ngo bagira ibimenyetso nk’iby’indwara y’ibicurane, harimo kugira umuriro,kubabara umutwe, nk’uko byatangajwe na Remy Saki, Guverineri wungirije w’Intara ya Kwango ndetse na Apollinaire Yumba, Minisitiri ushinzwe ubuzima muri iyo Ntara.
BBC na yo yanditse ko kugira umuriro, kubabara umutwe, kugira ibimwira mu mazuru, gukorora, guhumeka nabi cyangwa se kugorwa no guhumeka, kugira amaraso macyeya Ari bimwe mu biranga iyo ndwara.
Minisitiri w’ubuzima aho muri RDC yatangaje ko hari itsinda ry’abaganga ryoherejwe muri ako gace iyo ndwara yagaragayemo, kugira ngo bafashe mu kuvura vuba vuba abafatwa nayo. Ikindi ni uko ubuyobozi bw’inzego z’ubuzima bwatangaje ko hari ibizamini byamaze gufatwa ku barwayi bamaze kwandura iyo ndwara kugira ngo bijyanwe muri laboratwari.
Hari kandi ubugenzuzi burimo gukorwa mu buryo bwimbitse aho iyo ndwara yagaragaye, mu rwego rwo gushaka kumenya iyo ari yo, ibiyitera, aho yaturutse n’ibindi.
Ni indwara bivugwa ko iteye impungenge, kuko umubare w’abayandura ukomeza kuzamuka umunsi ku wundi nk’uko byatangajwe na Cephorien Manzanza, umwe mu bayobozi ba sosiyete sivile aho muri RDC.
Manzanza yagize ati, “Panzi (aho iyo ndwara yagaragaye bwa mbere) ni agace k’icyaro, ku buryo bigoye kugezayo imiti”.
Hari bamwe mu barwayi banduye iyo ndwara bapfira mu ngo zabo kubera kubura ubuvuzi nk’uko byemejwe n’abo bayobozi mu nzego z’ubuzima.
Inzobere mu bijyanye n’indwara z’ibyorezo (épidémiologiste) ukorera muri ako gace, yemeza ko iyo ndwara yibasira cyane abagore n’abana kurusha abandi.
Umuvugizi w’Ishami ry’Umuryango w’Abibumbye ryita ku Buzima (OMS) ku wa Kabiri tariki 3 Ukuboza 2024, yatangaje ko inzego z’ubuzima muri UN zemeje ko iyo ndwara ihari muri RDC, kandi kugeza ubu irimo gukorana na Minisiteri y’Ubuzima ya RDC mu rwego rwo kumenya amakuru yose ajyanye n’iyo ndwara.
Aganira na BBC yagize ati, “Twohereje itsinda muri ako gace k’icyaro kugira ngo bajye gufata ibipimo byo gukorerwaho isuzuma muri Laboratwari”.
Kugeza ubu, Minisiteri y’ubuzima ya RDC, irasaba abaturage kurangwa n’ituze kandi bagakomeza kuba maso.
Zimwe mu ngamba zafashwe, harimo kurinda ko abantu bahurira hamwe ari benshi, gutanga amakuru ku muntu wese uketsweho iyo ndwara cyangwa se upfuye ku buryo butunguranye, bikamenyeshwa inzego z’ubuzima. Ikindi ni ukubahiriza amabwiriza y’isuku, harimo gukaraba kenshi n’amazi meza n’isabune. Kwirinda gukora ku murambo w’umuntu wishwe n’iyo ndwara bidakozwe n’abakozi bo kwa muganga babifitiye ububasha.
Rwanda tribune.com
