Umuhungu wa Museveni yahishuye ko afite umugambi wo gufata ibihugu byose bya EAC akabigira igihugu kimwe

General Muhoozi Kainerugaba, Umuhungu w’Imfura wa Perezida wa Uganda Yoweri Museveni yahishuye ko naramuka abaye umuyobozi wa Uganda afite intego yo guhindura Afurika y’Uburasirazuba (EAC) igihugu kimwe kizaba aricyo kinini ku mugabane w’Afurika.

Ibi Muhoozi yabitangaje yifashishije urukuta rwe rwa Twitter akunze kunyuzaho amakuru atavugwaho rumwe na benshi.

Mur ubu butumwa, General Muhoozi, yavuze ko yifuza kurema igihugu cyitwa United East Africa, yemeza ko kizaba ari icya 7 mu bunini ku Isi, kikaba icya mbere muri Afurika.

Muhoozi avuga ko United Eat Africa yifuza kurema izaba ifite ubuso bungana na kilometero kare 4,800,000. Ibi bizaha iki gihugu kuba icya mbere mu bunini ku mugabane wa Afurika n’uwa 7 ku rwego rw’isi aho kizahita kiruta igihugu cy’Ubuhinde gisanganwe uyu mwanya.

Yagize ati;” United East Africa izaba ifite ubuso bwa m² 4,800,000 bw’Ubutaka. Tuzaba turi igihugu cya 7 mu bunini bw’Isi, kuko tuzaba turusha Ubuhinde ubutaka bunini. Ibi nibyo twe nk’ikiragano gishya twahihayeho intego.”

General Muhoozi Kainerugaba ukubutse mu ruzinduko mu Rwanda, aherutse gutangaza byeruye ko ashaka kuyobora Uganda, anashimangira ko ise umubyara [Perezida Museveni] ashaje bityo agomba guha abato bakayobora.