Ian Kagame umuhungu wa Perezida Kagame ni umwe mubagiye kwinjizwa muba Ofisiye b’u Rwanda

Kuri uyu wa 04 Ugushyingo 2022 mu Rwanda hateganijwe imihango y’irahira ry’aba Offisiye bashya barahirira kwinjira mu Ngabo z’u Rwanda (RDF) nyuma yo gusoza amasomo n’imyitozo mu bya gisirikare bari bamaze igihe bakorera mu kigo cya gisirikare cya Gako mu Karere ka Bugesera. Aba bofisiye barimo n’umuhungu wa Perezida Ian Kagame.

Abo bofisiye basoje amasomo biteganijwe ko barahabwa ipeti rya Sous Lieutenant na Perezida Paul Kagame, Umugaba w’Ikirenga w’Ingabo z’u Rwanda.

Ian Kagame aherutse gusoza amasomo mu Ishuri rya Gisirikare ry’Ubwami bw’u Bwongereza, Royal Military Academy aho yahawe ipeti rya Sous Lieutenant.

Kugira ngo atangire gukorera igihugu muri RDF agomba kubanza kurahirira kwinjira mu Ngabo z’u Rwanda.

Ian Kagame yahawe ipeti mu gisirikare, mu gihe mu 2019 nabwo yari yasoje amasomo ye y’Icyiciro cya Gatatu cya Kaminuza, agahabwa Masters mu Bukungu yakuye muri Kaminuza ya Williams College yo muri Leta Zunze Ubumwe za Amerika.

Amahame y’igisirikare avugako kugira ngo utangire gukorera igihugu, by’umwihariko kwinjira muri RDF, ko  ugomba kubanza kurahirira kwinjira mu Ngabo z’u Rwanda, hanyuma ukabona gutangira akazi.

UWINEZA Adeline