Mu rubanza ruregwamo abantu umunani bakurikiranyweho kugaba igitero kuri General wigeze kuba Umugaba Mukuru w’Ingabo za Uganda, cyahitanye umukobwa we n’umushoferi we, Ubushinjacyaha bwasabye ikindi gihe cyo gukusanya ibimenyetso.
Kuri uyu wa Mbere tariki 14 Ugushyingo 2022, aba bantu umunani bakurikiranyweho kugaba igitero ku modoka ya Gen Edward Katumba Wamala umwaka ushize, bagejejwe imbere y’Urukiko ariko ntibaburana.
Abaregwa ni Yusuf Siraje Nyanzi, Hussein Sserubula, Muhammad Kagugube, Sirimani Kisambira, Abudullah Aziz Ramadhan, Dunka, Kamada Walusimbi, Habib Ramadhan Marjan na Huzaifah Wampa.
Ubushinjacyaha bugizwe na Lino Anguzu; Marion Ben Bella na Joseph Kyomuhendo, bwabwiye Urukiko ko nubwo bwamaze kugeza ibimenyetso ku banyamategeko b’uruhande rw’abaregwa ariko bagikeneye igihe kuko hari ibimenyetso bugitegereje.
Urukiko rwimuriwe tariki 28 Ugushyingo 2022 ndetse uruhande rwunganira abaregwa rwo ntirwagira inzitizi rutanga.
Gusa umwe mu banyamategeko bunganira abaregwa, yavuze ko yifuza ko abaregwa barekurwa by’agateganyo kuko bakorewe iyicarubozi aho bafungiye bityo bakaba bafunzwe mu buryo bunyuranyije n’amategeko.
Uyu munyamategeko witwa Nalukoola Luyimbazi yavuze kandi ko ibimenyetso by’ubushinjacyaha bidafite ishingiro kuko bitarimo ireme ndetse bikaba bidafite icyo bishingiraho.
Aba bantu bakurikiranyweho ibyaha 30, baregwa kugira uruhare mu gitero cyabaye muri Kamena 2021, cyagabwe ku modoka ya General Gen Edward Katumba Wamala, cyahitanye umukobwa we Brenda Nantongo n’umushoferi we Haruna Kayondo.
RWANDATRIBUNE.COM
