Urukiko Rwisumbuye rwa Huye, rwakatiye abagabo babiri igihano cyo gufungwa burundu nyuma yo kubahamwa icyaha cyo kwica umumotari barangiza bagataba umurambo we mu sihyamba rya ISAR-Rubona mu Karere ka Huye.
Ni icyemezo cyafashwe n’Urukiko Rwisumbuye HUYE ruri mu Kagari ka Muhororo, Umurenge wa Ruhashya mu Karere ka Huye, tariki 07 Ukuboza 2022.
Abahamijwe iki cyaha; ni NYANDWI Viateur w’imyaka 42 na HAKIZIMANA Jean Claude w’imyaka 20 bishe umumotari ISHIMWE Zabroni w’imyaka 23 bakanamwambura moto bamukubise umuhini n’umuhoro mu mutwe.
Urukiko Rwisumbuye rwa Huye rwahamije ibyaha bibiri aba bagabo, ari cyo cy’ubwicanyi n’ubujura bukoreshejwe intwaro, maze ruhanisha buri wese igifungo cya burundu muri gereza.
N’ubwo abaregwa baburanye bemera ibyaha byombi bagasaba imbabazi, urukiko rwabahanishije icyo gifungo cya Burundu nk’uko byari byasabwe n’Ubushinjacyaha, kubera ubugome n’ubukana bakoranye ibyo byaha n’ingaruka byagize ku muryango.
RWANDATRIBUNE.COM
