Abanyekongo bashigikiye Moise Katumbi ,Umunyapolitiki akaba n’umuherwe ukomoka mu Ntara ya Katanga, bamaganye ibiri kumukorerwa n ‘impamvu muri iyi minsi abari ku ruhande rwa Perezida Felix Tshisekedi, batangiye kumwibasira bamwita Umunyamahanga w’Umuyahudi.
Francis Kalombo umwe mu Banyapolitiki bashigikiye Moise Katumbi, avuga ko iki kibazo cyo kwita Katumbi Umunyamahanga w’Umuyahudi, atari icya none kuko cyatangiye ku gihe cy’Ubutegetsi bwa Joseph Kabila.
Akomeza avuga ko ibiri kuba kuri Moise Katumbi muri ibi bihe, bisa neza nk’ibyamubayeho mu gihe cyUbutegetsi bwa Joseph Kabila, ubwo yatangazaga ko azahangana nawe mu matora y’Umukuru w’igihugu.
Icyo gihe, Joseph Kabila n’abambari be bibasiye Moise Katumbi batangira ku muhimbira ibyaha ari nako bavuga ko atari Umunyekongo.
Yagize ati:” Kwita Moise Katumbi Umunyahanga ni ikibazo cyatangiye mu gihe cy’Ubutegetsi bwa Joseph Kabila. Ibiri kumubaho muri iyi minsi, birasa neza nk’ibyamubayeho icyo gihe.
Ku bwa Kabila ,yatangiye kwibasirwa no kwitwa Umunyahanga nyuma y’uko atangaje ko azahatana na Kabila mu matora y’umukuru w’igihugu.”
Yongeye ko no muri iyi minsi amatora yegereje kandi Moise Katumbi akaba aherutse kwitandukanya n’ihuriro “Union Sacree” rishigikiye Perezida Felix Tshisekedi, akanatangaza ko azahatana nawe mu matoro y’umukuru w’Ihigugu muri 2023, nabwo yongeye kwibasirwa yitwa Umuyahanga w’Umuyhudi utemerewe kuyobora DRC.”
Francise Kalombo, akomeza avuga ko ababyihishe inyuma, ari Perezida Felix Tshisekedi n’abagize ihuriro “Union Sacree” rigizwe n’Amashyaka amushyigikiye ,biturutse k’ukuba aheruka kwitandukanya nabo, bakaba bikanga ko Moise katumbi ufite umubare munini w’Abanyekongo bamuri inyuma , ashobora kuzababangamira mu matora y’Umukuru w’Igihugu ateganyijwe mu mwaka utaha.
Yanzura avuga ko, bitumvikana ukuntu bamwita Umunyamahanga kandi afite Indangamuntu na Passport bya DRC yahawe n’Ubutegetsi bwa DRC nk’Umwenegihugu ,ndetse bikaba bitangiye muri iyi minsi Moise Katumbi atandukanye n’Ihuriro “Union Sacree” rishyigikiye Perezida Felix Tshisekedi.
Kuwa 19 Ukuboza 2022, nibwo Eric Ngalula Ilumga Umudepite ukomoka mu Ntara ya Kasayi y’Uburasirazuba akaba n’Umuyoboke w’Ishyaka UPDS rya Perezida Felix Tshisekedi, yavugiye mu Itangazamakuru ko Moise Katumbi ari Umunyamahanga w’Umuyahudi , bityo ko atujuje ibisabwa ngo abe yaba Umuyobozi wa DRC.
Yanongeyeho ko atamerewe no kujya ku rutonde rw’Abiyamamaza ngo kuko atari Umunyekongo.
HATEGEKIMANA Claude
Rwandatribune.com
