Imodoka yo mu bwoko bwa Bisi ya kompanyi itwara abagenzi ya Volcano mu Rwanda, yagonganye n’indi modoka itwara abagenzi ya kompanyi yo muri Kenya, zagonganiye muri Uganda, bamwe mu bari bazirimo bahasiga ubuzima.
Iyi mpanuka yabaye mu gitondo cya kare cyo kuri uyu wa Gatanu tariki 30 Ukuboza 2022 nkuko tubikesha ibinyamakuru byo muri Uganda.
Imodoka ya Volcano ifite Plaque ya RAD798B, mu gihe imodoka yo muri Kenya ikaba ari n’iya kompanyi na yo itwara abagenzi ya Oxygen yo ifite plaque ya KCU 054L.
Amakuru avuga ko iyi mpanuka yabereye mu gace k’icyaro kazwi nka Rwahi kari mu rugabano rw’Uturere tubiri ari two Ntungamo na Rukiga, yahise ihitana abantu batandatu.
Mu bahise bahasiga ubuzima, bivugwa ko harimo abashoferi b’izi modoka dore ko zanagonganye ku bice by’imbe zazo zigasekurana bikomeye.
Amakuru avuga ko iyi mpanuka yanakomerekeyemo abantu bagera muri 30, bahise bajyanwa ku Kigo Nderabuzima cya Lotom kiri mu gace kitwa Muhanga kiri muri aka gace kabereyemo iyi mpanuka.
Polisi ya Uganda yo muri aka gace, itangaza ko iyi mpanuka ishobora kuba yatewe n’igihu cyariho ubwo izi modoka zari mu rugendo, gishobora kuba cyatumye abari bazitwaye batasha kubona neza imbere, bigatuma bagongana.
Izi modoka zombi zo mu bwoko bwa bisi zitwara abagenzi, zasekuraniye ku bice by’imbere zihita zinangirika bikomeye.
RWANDARIBUNE.COM
