Nyuma yuko mu rusengero ruherereye i Kasindi muri Repubulika Iharanira Demokarasi ya Congo haturikiye igisasu kigahitana abakristu 14, Umutwe wiyitirira Leta ya Kisilamu wigambye ko ari wo uri inyuma y’iki gitero.
Iki gitero cyabaye ku Cyumweru tariki 15 Mutarama 2023, ahari hateraniye abakirisitu benshi, cyaguyemo abantu 14 gikomerekeramo abarenga 70.
Umutwe wiyita Leta ya Kisilamu ubinyujije mu kinyamakuru cyawo kitwa Aamaq, wavuze ko ari wo wakoze iki gitero.
Wavuze ko ibi wabitewe no kuba igisirikare cya Congo Kinshasa gikomeje kugaba ibitero ku barwanyi bawo.
Uyu mutwe wiyita Leta ya Kisilamu usanzwe ukorana na ADF isanzwe irwanya Leta ya Uganda ufite ibirindiro mu mashyamba ya Congo.
Umutwe wiyita Leta ya Kisilamu uvuga ko “Igihe cyose ingabo za Congo zizakomeza kugaba ibitero ku bambari bacu, tuzakomeza gukora ibi bikorwa.”
Umutwe wa ADF uvugwaho gukana n’umutwe wa Leta ya Kisilamu, ni umwe mu mitwe ikomeje guhitana inzirakarengane nyinshi muri Repubulika Iharanira Demokarasi ya Congo byumwihariko mu gace ka Beni.
RWANDATRIBUNE.COM
