Hafashwe umwanzuro ku rubanza rw’umwana w’i Kigali rwavugishije benshi aho Urukiko Rwisumbuye rwa Nyarugenge rwamukatiye igifungo cy’imyaka ibiri isubitse n’ihazabu ya miliyoni 1Frw, nyuma yo kumuhamya icyaha cyo gucuruza ibiyobyabwenge.
Uyu mwana utuye mu Murenge wa Kimisagara, Akarere ka Nyarugenge, yatawe muri yombi mu Kwakira 2022 aho yahise ajya gufungirwa kuri Sitasiyo ya Rwezamenyo nyuma y’uko abashinzwe umutekano bamusanze mu rugo iwabo, bakahasanga udupfunyika 52 tw’urumogi.
Uyu mwana yaburanye yemera icyaha ariko akavuga ko yabishiwemo n’ababyeyo be mu iburanisha ryo ku wa 31 Mutarama 2023.
Ubushinjacyaha bwavuze ko ubwo abashinzwe umutekano bageraga muri urwo rugo, bahasanze uwo mwana wenyine cyane ko ubu nyina afunzwe akurikiranyweho gucuruza ibiyobyabwenge mu gihe se kuri uyu munsi akimenya amakuru yahise aburirwa irengero kugeza n’ubu.
Nyuma y’uko amakuru y’uru rubanza amenyekanye hazamutse impaka bamwe bakavuka ko afite imyaka 13 adashobora gukurikiranwa gusa byagaragajwe ko yavutse mu 2008 bivuze ko afite imyaka 15, gusa abakoresha izi mbuga ntibyarekeye aho kuko bakomeje gutinda ku itariki nyirizina yavukiyeho itarigeze itangazwa.
