Inama ngoboka gihugu  ivugwa na CNRD/FLN ihatse iki?

Umutwe wa CNRD/FLN urwanya ubutegetsi bw’u Rwanda, ukomeje gahunda yo kumurika icyo bise“Maratho Politique” ikubiyemo imirongo migari ,uyu mutwe uvuga ko uzagenderaho numara gufata ubutegetsi mu Rwanda.

Dr Innocent Biruka umunyamabanga wungirije wa CNRD /FLN igice cya Gen Maj Jeva,  amaze iminsi muri gahunda yo kwamamaza icyo bise “Marato politique” ,aho asobanura ko ikubiyemo gahunda CNRD/FLN izagenderaho,  nimara kugera k’ubutegetsi mu Rwanda  harimo n’icyo bise “Inama ngoboka gihugu”

DR Innocent Biruka, akomeza avuga ko kugirango ibyo bizagerweho, Abanyarwanda bose bazahabwa ijambo kandi bakavuga akabari ku mutima.

Yongeraho   ko iyi “Nama ngoboka gihugu” ya CNRD/FLN ,  izafatwa nk’urwego rw’igihugu rw’ikirenga ndetse ko ruzaba rufite ubushobozi burenze ubwa guverinoma ya CNRD/FLN y’inzibacyuho izaba yagiyeho, ngo  kuko ruzaba rufite inshingano zikomeye  ,zirimo kunga Abanyarwanda , gushaka umuti w’ibabazo byose byugarije igihugu no gusaba ko guverinoma yahindurwa mu gihe hari ibitagenda neza.

CNRD/FLN ,ikomeza ivugako  iyo Nama  izasuzuma ndetse  ikaniga  ku bibazo byazonze umuryango Nyarwanda  ku  ngoma zose zabayeho mu Rwanda.

Ubushobozi bwa  CNRD/FLN  buracyemangwa!

Benshi mu     bakurikiranira hafi ibimaze igihe bibera mu mutwe wa CNRD/FLN, bemeza ko uyu mutwe nta bushobozi ufite bwo gufata ubutegetsi mu Rwanda, kuko wamaze gucikamo ibice  ndetse benshi mu barwanyi bawo bakaba baratorotse, mu gihe abanyapolitiki benshi bari bawugize nabo bamaze gukuramo akabo karenge .

Hari n’abandi bakemanga ubushobozi bw’abagize uyu mutwe mu kunga Abanyarwanda nk’uko ubivuga, mu gihe benshi mu bawugize  barangwa n’amacakubiri ashingiye ku moko, gupfobya no  guhakana  Jenoside yakorewe abatutsi mu 1994 n’urwango rukomeye bafitiye Abatutsi.

Iyi ngengabitekerezo y’abagize uyu mutwe, ikaba ikomoka kuri FDLR dore ko abashinze CNRD/FLN ari abahoze mu buyobozi bukuru bwa FDLR barimo Col Wison Irategeka, baje kwitandukanya nayo bagashinga uwabo mutwe bapfa ikibazo cya Kiga-Nduga.

Kugeza ubu kandi ,muri uyu mutwe hahora intambara  zidashyira zishingiye ku macakubiri y’ amoko n’uturere, kurwanira ubuyobozi n’amafaranga, hakibazwa uburyo abananiwe gushyira hamwe bazabasha gufata ubutegetsi mu Rwanda ndetse bakabasha kunga Abanyarwanda no gukemura ibibazo byose by’igihgu nk’uko babivuga .

Hamenyekanye ikibyihishe inyuma!

CNRD/FLN imaze iminsi iri kugerageza kongera kureshya abahoze bayitera inkunga, nyuma yaho benshi  bamaze kuyitera umugongo ,bitewe n’amakimbirane no kutumvikana byakunze kuranga abayobozi bayo.

Ubu uyu mutwe  wamaze gucikamo ibice biriri, kimwe cya Gen Maj  Hakizimana Antoine Jeva ikindi cya Lt Gen Habimana Hamada, ariko igice cya Gen Maj Jeva kikaba aricyo gikomeje kwemeza ko aricyo cyemewe ndetse ko kiri gusubiza ibintu mu buryo.

Usibye iyi  gahunda bise”Inama ngoboka gihugu”, CNRD/FLN ikomeje no kureshya abayiteye umugongo ,ibabwira ko muri uyu mwaka wa 2023 igiye kongera kugaba ibItero mu Rwanda ndetse ko yizeye neza ko izahita ifata ubutegetsi.

Bamwe mu bakoranye bya hafi na Gen Maj Jeva batashatse ko dushyira amazina yabo hanze , bavuga ko ubu ari uburyo akunze gukoreshya agamije kwibonera amafaranga aturutse mu misanzu, aho avuga ko  iyo misanzu igamije  gutera inkunga urugamba ari gutegura ku Rwanda  ariko bikarangira ayishyireye mu mufuka we.

Ibi kandi ngo nibyo yapfuye na Lt Gen Hamada n’abandi bamushyigikiye barimo Chantal Mutega ,Hategekimana Felicien n’abandi ,byatumye bshwana  buri wese ashyinga uwe mutwe.

Bakomeza bavuga ko muri iyi minsi,  CNRD/FLN yacitse intege k’uburyo bufatika ndetse uyu mutwe ukaba wugarijwe n’ibibazo by’ubukene bikabije.

Gen Maj Jeva  n’agatsiko ke , ngo basanze kubona andi mafaranga bisaba gushyiraho gahunda za baringa ,bagaragaza ko bagiye gutangiza intambara ku Rwanda kugirango bibonere amafaranga nk’ayo bari basnzwe babona mbere, ngo  naho ubundi  ibyo gufata ubutegetesi mu Rwanda nabo bazi neza ko batabyishoboza.