Ibihumbi by’abashoferi muri Afurika y’epfo kuri uyu wa Gatatu byiriwe mu myigaragambyo ikomeye yahagaritse ubuzima mu gice gikorerwamo ubucuruzi mu murwa mukuru Pretoria.
Intandaro y’iyi myigaragambyo nk’uko bitangazwa n’ibitangazamakuru bitandukanye bikorera muri kiriya gihugu, ngo ni umwe mu bashoferi wishwe arashwe kuwa Kabiri n’umwe mu bapolisi bikekwa ko akorana n’abacuruzi b’ibiyobyabwenge.
Ibi byateye abashoferi kurakara cyane bituma bafunga imihanda itandukanye mu mujyi ya Pretoria bakoreshe imodoka basanzwe batwaramo abantu mu buryo bwa rusange nk’uko byanditswe n’ikinyamakuru News24 .
Amaduka yasahuwe
Uretse gufunga imuhanda, abigaragambya bigabije n’amaduka menshi bakeka ko ba nyirayo baba bakorana n’abacuruza ibiyobyabwenge maze basahura ku bwinshi ibicuruzwa bitandukanye biyarimo ari nako batwika andi maduka.
Aka kavuyo katumye hitabazwa polisi n’igisirikare, bikaba bitangazwa ko mu kugerageza guhosha imvururu hitabajwe ibyuka biryana mu maso ndetse n’amasasu ya nyayo; ibintu byatumye benshi bakomereka, abandi “bitaba Imana,” nk’uko bikomeje gutangazwa n’ibitangazamakuru bitandukanye.
Alex Mitchley, umwe mu banyamakuru bakorera muri Afurika y’epfo yanditse kuri Twitter ko, “Polisi yatangiye guta muri yombi abitwikiye imyigaragambyo bagasahura amaduka,”
Andi mafoto
Amafoto: Alex Mitchley
Ubwanditsi
