Kuva ku munsi wejo tariki ya 4 Mata 2023, Perezida wa Kenya William Ruto yageze mu ruzindiko rw’akazi mu Rwanda, aho yabonanye na mugenzi we w’u Rwanda Perezida Paul Kagame bagirana ibiganiro .
Nyuma y’ibi biganiro, Perezida Willian Ruto na Paul Kagame bagiranye ikindi kiganiro n’itangazamakuru, basubiza ku bibazo bitandukanye bireba u Rwanda na Kenya n’ Umuryango w’Ibihugu by’Afurika y’Iburasirazuba (AEC) muri rusange .
Umunyamakuru wa Azamu TV yo muri Tanzania, yababajije ikibazo kijyanye n’ubuzima bukomeje guhenda mu bihugu bigize EAC, aho usanga abaturage batunga agatoki Abayobozi b’ibihugu ko aribo bakagombye kugira icyo bakora kugira ngo ibiciro by’ibibwa bikomje gutumbagira bigabanuke.
Mu gusubiza, Perezida William Ruto yavuze ko ikibazo cy’ubuzima buhenze mu bihugu bigize umuryango wa EAC kitugarije ibihugu bigize uyu muryango byonyine ahubwo gihuriweho n’isi yose muri rusange, bitewe n’icyorezo cya Covid-19 ,ibibazo by’intambara imaze umwaka urenga hagati ya Ukraine n’Uburusiya hakiyongeraho n’imihindagurikire y’ikirere yatumye umusaruro w’ibikomoka ku buhinzi uba mucye.
Ati:’’ Ntabwo ari ikibazo cy’umwihariko ku bihugu bigize umuryango wa EAC. Ni ikibazo cyugarije Isi yose muri Rusange. Twahuye n’icyorezo cya Covid-19 , n’ikibazo cy’ntambara iri hagati ya Ukraine n’u Burusiya n’ibindi bibazo bikomeye birimo imihindagurikire y’ikirere.”
K’urundi ruhande, Perezida William Ruto yanagaraje ko hari imbogamizi mu kwambuka imipaka hagati y’ibihugu bigize Umuryango wa EAC ,we yemeza ko nayo ari imwe mu mpamvu ituma ubuzima bw’abatuye mu bihugu bigize uyu muryango burushaho gukomera.
Ati:“Ni muri urwo rwego tugomba gufatanya, tugakuraho ibibazo by’imipaka dufite kuko inzitizi ziri ku mipaka yacu zikumira ibiribwa biva mu Rwanda bijya muri Kenya, biva Tanzania bijya muri Uganda, ibibazo nk’ibyo. Ni yo mpamvu tugomba kugira ubwumvikane nk’ubwo tumaze kwemeranya n’u Rwanda no kugira imikoranire myiza hagati y’ibihugu byacu, kugira ngo dushobore gufatanya mu gihe hari ahabonetse ikibazo nk’icyo cy’inzara”
Mukarutesi Jessica
