RUD-Urunana ya Ajida Yasolo irashyirwa mu majwi mu kwica abaturage 24 muri Nyabanira na Giseguro

Nyuma y’ibyumweru 2 bishize uduce twa Nyabanira n’a Giseguro  twagenzurwaga n’abarwanyi ba M23 ubu turi mu maboko y’inyeshyamba za RUD URUNANA , nyamara abaturage bo muri utwo duce baratabaza

Ku italiki ya 06 Mata 2023 nibwo Inyeshyamba za RUD zifatanije n’Ingabo za Leta ya Repubulika Iharanira Demokarasi ya Congo FARDC, zishe urw’agashinyaguro umuyobozi wo mu gace ka Giseguro muri Rutshuru, zimushinja gukorana n’inyeshyamba za M23.

Uyu muyobozi wo mu gace ka Giseguro wishwe n’inyeshyamba za RUD, yari amaze igihe gito asimburanye n’undi witwa Maombi nawe wishwe bamuziza ko yaba yarakoranaga n’umutwe w’inyeshyamba wa M23.

Nyuma y’iyo minsi abarwanyi ba CRAP ya RUD URUNANA bishe abaturage 12 bo mu mujyi wa Nyabanira, bavuka mu muryango umwe bawushinja gukorana na M23.

Umuyobozi wa Sosiyete Sivile muri Binza yabwiye Rwandatribune ko usibye abo muri uwo muryango baherutse kwicwa,hari n’abandi bahinzi batanu basanzwe mu murima mu gace ka Makoka bariguhinga mu mirima yabo, bakubiswe inkoni n’abarwanyi ba RUD URUNANA  kugeza ubwo bashizemo umwuka.

Uyu Muyobozi kandi ntiyariye iminwa ,mu kiganiro yagiranye na Rwandatribune yavuze ko u witwa Ajida Yasolo wasimbuye Maj.Nshimiyimana Cassien wari uzwi ku mazina ya Gavana ariwe uri hejuru y’ubu bwicanyi.

Umutwe wa RUD URUNANA ugizwe n’abahoze ari abarwanyi ba FDLR ,ukaba warashinzwe na Gen.Musare wari ukuriye Brigade yitwaga SONOKi yabarizwaga muri FDLR ahagana mu mwaka wa 2003 uyu Gen.Musare hamwe n’abandi barwanyi barimo Gen.Afurika Jean Michel bigumuye kuri Lt.Gen.Mudacumura bashing umutwe wabo.

Mwizerwa Ally