Fortunat Bisele uheruka gutabwa muri yombi agafungwa azira ku mena amabanga hagati ya Perezida Paul Kagame na Felix Tshisekedi, yarekuwe byagateganyo ku mpamvu z’uburwayi kugirango abone ako atangira kwivuza.
Fortunat Bisele wahoze ari umujyanama wihariye wa Perezida Felix Tshisekedi, yatawe muri yombi mu mu mpera z’ukwezi kwa Mutarama 2023 ajya gufungirwa muri gereza nkuru ya Kinshasa izwi nka”Makala”, nyuma yaho ubushinjacyaha bukuru bwa DRC busohoye impapuro zo kumuta muri yombi.
Ni nyuma y’ikiganiro yagiranye n’umunyamakuru Alain Foka ukorera Radiyo Mpuzamahanga y’Abafaransa (RFI), akamena amabanga Perezida Felix Tshisekedi yagiranye na Perezida Kagame hataraza agatotsi mu mubano wabo.
Icyo gihe, Fortunat Bisesele yavuze ko “Perezida Tshisekedi akijya ku butegetsi ,yasabye Perezida Paul Kagame kumufasha gucuruza amabuye y’agaciro ya DRC arimo zahabu, bitewe n’uko yamubonaga nk’umugabo ufite ubunararibonye kandi uziranye n’abashoramari bakomeye ku Isi.”
Fortunat Bisele, yakomeje avuga ko Perezida Tshisekedi yasabye Perezida Paul Kagame kubyaza umusaruro ubwo bucuruzi, mu buryo bwakungukira u Rwanda na Repubulika Iharanira Demokarasi ya Congo .
Bisesele kandi, yongeyeho ko we ubwe “yagiye aza i Kigali kenshi azaniye Perezida Kagame ubutumwa bukubiyemo uwo mushinga nk’umujyanama wihariye wa Perezida Felix Tshisekedi.”
Ni ibintu byarakaje cyane Perezida Felix Tshisekedi n’abambari be ndetse fortunat Bisele atangira gushinjwa ubugambanyi ,kumena amabanga ya Leta no gukorana n’ibihugu bise “abanzi ba DRC” byatumye kuwa 15 Mutarama 2023, Perezida Tshisekedi ahita amwirukana kuri uwo mwanya amusimbuza Kahungu Mandungu.
Nyuma y’iminsi micye, Fortunat Bisele yahise atabwa muri yombi ajya gufungirwa muri gereza nkuru ya Makala iherereye i Kinshasa, akaba yarekuwe by’agateganyo nyuma y’icyemezo cy’urukiko rukuru rwa Kinshasha kugirango abone uko atangira kwivuza.
