Padiri Wenceslas Munyeshyaka yahanishijwe igihano cy’ikirenga kidashobora kujuririrwa cyangwa ngo gihinduke cyo kwirukanwa ku murimo w’Ubusaserdoti nk’igihano gikuru muri Kiliziya.
Iki cyemezo cyasohotse mu ibaruwa yanditswe na Musenyeri Nourrichard yo ku wa 2 Gicurasi 2023 imenyesha Padiri Munyeshyaka ko bidasubirwaho yahanaguweho uburenganzira busesuye bw’Abihayimana bityo ahejwe burundu mu murimo w’Ubusaseridoti akaba adashobora kongera gusoma Misa nk’Umupadiri cyangwa ngo abe ari kumwe n’uwayisomye cyangwa guhaza abakirisitu.
Padiri Munyeshyaka ni Umupadiri wa Arkidiyosezi ya Kigali, wabaga muri Diyosezi ya Évreux mu Bufaransa.
Padiri Munyeshyaka kandi agomba kwirinda no gukandagira ahantu hose bamuzi ko yari Umupadiri. Padiri Munyeshyaka Wenceslas kandi ni Umupadiri wahoze akuriye Paruwasi ya Sainte Famille mu gihe cya Jenoside yakorewe Abatutsi. Abamuzi bibuka ko mu 1994 yagendanaga imbunda yo mu bwoko bwa ‘Masotela’ ku itako.
Yavuzweho gufata abagore ku ngufu ndetse bamwe ameze nk’uwabagize abagore be. Hari umwana w’umukobwa yasambanyije ku gahato waje no kubitangaho ubuhamya.
Yashinjwe kwica Abatutsi bari barahungiye kuri Sainte-Famille, muri Saint-Paul no kuri Cela. Yahungiye mu Bufaransa mu 1994, akingirwa ikibaba.
Umunyamabanga wa Musenyeri wa Évreux yahamije ko kwirukanwa kwa Padiri Munyeshyaka kudafitanye isano na Jenoside yakorewe Abatutsi, ahubwo ari urukurikirane rw’ibihano yahawe mu 2021 bijyanye n’umwana yemeye ko yabyaye.
Padiri Munyeshyaka w’imyaka 65 yakoreraga umurimo we muri Paruwasi ya Mutagatifu Saint-Martin de la Risle i Brionne mu Bufaransa. Yemereye uwari umushumba we koko ko yabyaye kandi ko yifuza n’undi mwana.
Ku wa Gatanu, tariki 3 Ukuboza 2021, Musenyeri wa Diyoseze ya Évreux, Christian Nourrichard, yasohoye itangazo rihagarika Padiri Munyeshyaka nyuma y’uko yemeye ko afite umwana w’umuhungu.
Nyuma yiryo tangazo yatangiye ubuzima bushya nk’umuturage aho kuba uwihaye Imana. Abarizwa muri Komine ya Gisors mu Bufaransa. Umwana wa Padiri Munyeshyaka yavutse muri Nyakanga 2010, aba muri iyo komini se abamo.
Musenyeri Christian Nourrichard yafashe umwanzuro wo kumuhagarika, kuko ibyo yakoze bihabanye n’amahame ya Kiliziya agenga Abasaseridoti.
Padiri Munyeshyaka yahagarikiwe kandi amasakaramentu yose, bivuze ko agiye kubaho nk’Umulayiki, nashaka kongera kuyahabwa bizasaba ko aba Umugarukiramana.
Uwineza Adeline
