Muri Arabia Saoudite hari kubera ibiganiro byo guhuza igisirikare cya Leta ya Sudan ya ruguru n’umutwe witwara Gisirikare witwa Rapid Support Forces (RSF), ibintu byatangajwe kubera ko nta gahenge kigeze gatangwa n’impande zombi muri iyi minsi hari kuba ibiganiro.
Ibi biganiro kandi biyobowe na Arabie Saoudite (Saudi Arabia) n’Amerika, bakaba ari nabo bahuza b’uyu mutwe urwanya Leta n’Ingabo za Leta. Ni ibiganiro biri kubera i Jeddah bikaba byaratangiye ku wa 6 Gicurasi bikaba bigikomeje kugeza uyu munsi, ariko mu bigaragara akaba nta musaruro ugaragara biratanga.
Umukuru w’igisirikare cya Sudan Jenerali Abdel Fattah al-Burhan ari nawe uyoboye igihugu cya Sudan muri iki gihe n’umukuru wa RSF Jenerali Mohamed Hamdan Dagalo, uzwi cyane nka Hemedti, ni bo barimo guhatanira ubutegetsi.
Ariko Jenerali Burhan ku wa mbere yabwiye televiziyo Al-Qahera News TV yo mu Misiri ko nta cyo bimaze kwicara ku meza y’ibiganiro muri Saudi Arabia mu gihe nta gahenge nyako gahari.
Jenerali Burhan yavuze ko kandi yakiriye neza gahunda zose zigamije gutuma amaraso areka gukomeza kumeneka mu gihugu, ariko ashimangira ko umutwe wa RSF ugomba gushyira intwaro hasi.
Amasezerano yo gusangira ubutegetsi yagezweho nyuma yuko uwari Perezida w’umunyagitugu Omar al-Bashir, wari umaze imyaka igera kuri 30 ku butegetsi, ahiritswe n’igisirikare nyuma y’imyigaragambyo ya rubanda.
Umukuru w’igisirikare cya Sudan Jenerali Abdel Fattah al-Burhan yasoje ashimangira ko umutwe wa RSF ugomba gushyira intwaro hasi kuko uri gukora ibintu bitemewe.
Uwineza Adeline
