Ubushinjacyaha bwa Repubulika bwatangaje ko Dr. Francis Habumugisha, umushoramari akaba na nyiri GoodRich TV ushinjwa gukubita umwe mu bakozi be b’igitsina gore yatawe muri yombi.
Ni nyuma y’uko uwitwa Diane Kamali, uvuga ko yahohotewe agaragaje ikibazo cye yifashishije urubuga nkoranyambaga rwa Twitter maze umukuru w’igihugu, Paul Kagame, akamwizeza gukurikirana iki kibazo.
Nyuma y’ubwo butumwa bwa Perezida Kagame, umushinjacyaha wa Repubulika Jean Bosco Mutangana nawe yanditse kuri Twitter ko “ucyekwa arafunze mu gihe iperereza rikomeje.”
Ati, “Mu gihe giteganywa n’itegeko ucyekwa azagezwa mu rukiko…”
Ubushinjacyaha kandi bwatangaje ko Dr. Habumugisha akurikiranyweho icyaha cyo gukubita yabigambiriye; icyaha gihanwa n’ingingo ya 121 y’itegeko numero 61/2018 ryo kuwa 30 Ugushyingo 2018 rigena ibyaha n’ibihano muri rusange.
Ubwanditsi
