Mukura victory Sport yegukanye igikombe cy’Agaciro itsinze Rayon Sports ibitego 2-1 mu mukino wabereye kuri Stade Amahoro i Remera kuri iki Cyumweru.
Ni umukino waranzwe no gusatirana ku mpande zombi mu minota 45 y’igice cya mbere ariko ubona ko nta mbaraga nyinshi, ubuhanga cyangwa guhuza cyane ku mpande zombi.
Gusa bavuye mu karuhuko, ikipe ya Mukura yafunguye amazamu ku munota wa 51 w’umukino ku gitego cyinjijwe na rutahizamu Samuel Nwosu Chukwude ukomoka muri Nigeria kuri Penaliti nyuma y’ikosa ryakozwe na Iragire Saidi, myugariro wa Rayon Sports ku mupira yari akoze n’intoki mu rubuga rw’amahina maze immusifuzi yemeza Penaliti.
Ntihaciyemo umwanya munini kuko igitego cya kabiri cyatsinzwe na Ndizeye Innocent atambutse abakinnyi b’inyuma ba Rayon maze aboneza mu rushundura nyuma y’iminota 4 gusa Mukura ibonye igitego cyayo cya kabiri.
Rayon Sports yagerageje gushaka intsinzi isatira Mukura maze ibona igitego cyayo ku munota wa 64 gitsinzwe kuri penaliti na rutahizamu Michael Sarpong nyuma y’aho myugariro wa Mukura yari akoze ku mupira n’intoki, Rayon Sports yakomeje gushaka igitego cya kabiri ariko biranga.
Uyu mukino waje kubonamo amakarita 2 y’umutuku ku mpande zombi kuko Rutanga Eric wa Rayon Sport yahawe ikarita itukura ku munota wa 70′ w’umukino kubera kwitotombera abasifuzi ndetse na Ndizeye Innocent wa Mukura ahabwa ikarita itukura ku munota wa 80′ ku ikosa yari akoreye Michael Sarpong.
Mukura yageze ku mukino wa nyuma nyuma yo gutsinda APR FC kuri penaliti 3-2
Mu mukino wo guhatanira umwanya wa 3 wari watangiye saa saba, ikipe ya Police FC yatsinze APR FC igitego 1 ku busa gitsinzwe na Iyabivuze Osee ku mupira mwiza yari ahawe na Nshuti Savio.
Irushanwa ry’Agaciro ritegurwa n’ikigega Agaciro Development Fund ku bufatanye n’Ishyirahamwe ry’umupira w’amaguru mu Rwanda (FERWAFA).
Hakorimana Christian
