Ahitwa i Nyakabungo mu kagali ka Gatonde mu murenge wa Kibungo mu karere ka Ngoma niho abakinnyi b’ikipe ya Rayon Sport bakoreye umuganda mu gace katoranijwe kubakwamo amazu y’abatishoboye ubwo bari mu gikorwa cy’umuganda wo kuri uyu wa gatandatu tariki ya 28 Nzeli 2019.
Iki gikorwa kibaye mbere y’amasaha make ikipe ya Rayon Sports yitegura gusoza umwiherero w’iminsi isaga 10 imaze ikorera mu karere ka Ngoma mu ntara y’Iburasirazuba.
Ubwo yari ahawe umwanya ngo agire icyo avuga, umutoza mushya wa Rayon Sports Javier Martinez Espinoza yashimiye abaturage ba Ngoma uburyo bakiriye iyi kipe ababwira ko ikipe ari iyabo kandi izakomeza kubaha ibyishimo.
Biteganijwe ko Gikundiro igaruka mu mugi wa Kigali igahitira muri La Paris Hotel i Nyandungu kwitegura umukino wa Super Cup izakina n’ikipe ya AS Kigali kuri uyu wa kabili kuri Stade Amahoro i Remera.
Mbere y’uko iyi kipe ya Rayon Sports yererekeza i Ngoma tariki ya ya 17 Nzeri muri uyu mwiherero wo kwitegura umwaka mushya wa shampiyona, umuyobozi wa Gikundiro Munyakazi Sadate yari yatangaje ko intego nyamukuru y’umwiherero ari ugutegura shampiyona ya 2019-2020 ndetse no kuzamura urwego rw’abakinnyi. Aho i Ngoma ni naho uyu mutoza mushya yamurikiwe abakinnyi anatangirirayo imirimo ye.
HAKORIMNA Christian
