Minisiteri y’ingabo yatangaje ko u Umutwe w’Inkeragutabara nawo ugiye gushyirwa mu bagenerwabikorwa b’Ihahiro ry’Inzego z’Umutekano, Armed Forces Shop (AFOS) kuko na wo ubyemerewe.
Byatangajwe na Minisitiri w’Ingabo, Juvenal Marizamunda ejo kuwa Kane, itariki ya 14 Werurwe 2024, ubwo Inteko Rusange y’Umutwe w’Abadepite yasuzumaga ishingiro ry’umushinga w’itegeko rishyiraho Ihahiro ry’Inzego zishinzwe kurinda igihugu n’umutekano.
Minisitiri w’Ingabo yasobanuye ko n’ubwo iri hahiro risanzweho kandi ibicuruzwa birimo bikaba bisonerwa umusoro, ngo ni ngombwa ko hagira irindi shoramari rikorwa kugirango rishobora guhaza ibyifuzo by’abarigana.
Ubusanzwe muri iri hahiro rizwi nka Army Shop, ni ukuvuga Armed Forces Shop (AFOS) hahahira abasirikare, abapolisi n’abacungagereza ndetse n’imiryango yabo.
Abadepite bitabiriye Inteko Rusange bakaba batoye ishingiro ry’uyu mushinga w’itegeko rishyiraho AFOS nyuma yo gukorerwa isuzuma rikazaza ryitwa umushinga w’itegeko kugeza igihe rizemerezwa nk’itegeko.
