Umutwe wa RNC ukomeje gutakaza abayoboke muri Uganda aho ubu hagezweho uwitwa Sulah Nuwamanya na Prossy Bonabana .
Uyu Nuwamanya na mugenzi we Bonabana bari abahuzabikorwa ba RNC muri Uganda basezeye mu mutwe wa RNC uyoborwa na Kayumba biturutse ku makimbirane amaze iminsi hagati y’abo na Frank Ntwari muramu wa Kayumba Nyamwasa.
Amakuru agera kuri Rwandatribune avuga ko Frank Ntwari amaze iminsi muri Uganda aho yagiye kugenzura Sulah Nuwamanya na Prossy Bonabana bakoresha imisanzu itangwa n’abayoboke ba RNC mu kiswe Intara ya Uganda.
Ngo ni nyuma y’aho Kayumba Nyamwasa ashwaniye na Pasteur Deo Nyirigira bapfa ko Nyirigira yari atacyohereza iyo misanzu muri Afurika y’Epfo hakiyongeraho ikibazo cya Felix Mwizerwa umuhungu wa Deo Nyirigira waburanye na Ben Rutabana biturutse ku bugambanyi bwa Kayumba Nyamwasa byatumye RNC imusimbuza Prossy Bonabana na Sulah Nuwamanya kugira ngo abe aribo bareberera inyungu za RNC muri Uganda.
Gusa ngo umusanzu bari babitezeho ntabwo RNC yawubonye kuko Sulah Nuwamanya na Prossy Bonabana bakiraga amafaranga y’imisanzu bakohereza make kwa Kayumba Nyamwasa ayandi bakayishyirira mu mifuka yabo.
Nyuma yo kubitahura Kayumba Nyamwasa na Muramuwe Frank Ntwari bahise babona ko Prossy Bonabana na Sulah Nuwamanya bagiye muri RNC bakurikiye amafaranga.
Amakuru Rwandatribune ikura ku bantu ba hafi ya Sulah Nuwamanya na Prossy Bonabana batashatse gushyira amazina yabo ahagaragara ku mpamvu z’umutekano wabo, bavuga ko kuri ubu, Prossy Bonabana na Sulah Nuwamanya bashaka guharira umwanya wabo mu gushaka amafaranga binyuze mu muryango wabo utegamiye kuri Leta ariwo Self-Worthy Initiative Development aho gushakira indonke muri RNC kuko ibyo bari bijejwe na Kayumba Nyamwasa batabibonye.
Nk’uko RNC yumva ko Uganda ariho ifite abayoboke benshi, Frank Ntwari na Mukankusi Charlotte barateganya kwimurira ibyicaro byabo muri Uganda ngo babashe kuziba icyuho cya Sulah Nuwamanya na Prossy Bonabana no guhuza ibikorwa bya RNC muri Uganda.
Abava muri RNC bose bemeza ko ubu uyu mutwe wa Kayumba Nyamwasa usigaye ushingiye ku muryango we byumwihariko Muramu we Frank Ntwari n’umugore we Kayumba Rosette n’inshuti ze nka Charlotte Mukankusi.
Sulah Nuwamanya na Prossy Bonabana ni bamwe mu bambari ba RNC muri Uganda aho bakunze gukorana na CMI mu guhohotera no gukorera iyica rubozo Abanyarwanda baba muri icyo gihugu.
Kuba nabo biyongereye ku bandi nka Theogene Rudasingwa, Gahima Gérard, Jonathan Musonera, Noble Marara, Kazigaba André, Deo Nyirigira , Jean Paul Turayishimiye, Tabita Gwiza n’abandi benshi utabasha kurondora basezeye RNCni ikigaragaza ko uyu mutwe uhora usenyuka uko umwaka utashye ndetse kuri ubu ukaba usa nuri mu marembera .
Andi makuru agera kuri Rwandatribune avuga ko ubu hari umwuka utari mwiza mu bayoboke ba RNC muri Uganda aho hari bamwe bagitsimbaraye kuri Kayumba Nyamwasa mu gihe abandi batari bake babona ko ntacyo azabagezaho ndetse ngo bakaba barambiwe gutanga amafaranga yabo kuko nta musaruro babibonamo.
Hategekimana Claude
