Umushinga w’indege yakozwe n’abana bo muri Afurika y’epfo ngo ive i Cape igere i Cairo igaruke, watangaje urupfu rw’abayobozi bawo mu mpanuka y’indege yabereye muri Tanzania.
Ni impanuka yabaye ejobundi kuwa gatandatu i Tabora muri Tanzaniya yaguyemo Abanyafurika y’epfo babiri, iyi ndege yariho yerekeza muri Malawi nk’uko byahise bitangazwa na Azam TV yo muri Tanzaniya.
Umushinga U Dream Global watangaje ko “ubabajwe no gutangaza impanuka y’indege y’ubufasha yapfiriyemo abayobozi b’uyu mushinga Des Werner na Werner Froneman”.
U Dream Global yatangarije kuri Facebook ko nta wundi muntu wagiriye ikibazo kubera iyi mpanuka.
Uwatekereje umushinga yapfushije se
Umushinga wa U Dream Global watekerejwe na Megan Werner, umukobwa w’imyaka 17 washakaga kugera ikirenge mu cya se Des Werner usanzwe ari umupilote.
Megan Werner wagize igitekerezo cy’uyu mushinga, umubyeyi we yawuguyemo mu mpanuka
We na bagenzi be bagera kuri 20 b’urungano batangiye uyu mushinga, bubaka indege yabo nubwo bari batarabona uburenganzira bwo gutwara indege.
Des Werner usanzwe ari umupilote w’indege za gisiviri yiyemeje kuba hafi y’uru rubyiruko mu nzozi zarwo zo gutwara indege rwiyubakiye nk’uko yabibwiye BBC mu ntangiriro z’ukwezi kwa gatandatu.
Babigezeho, muri uko kwezi bahaguruka i Cape berekeza i Cairo bagomba guhagarara mu bihugu 11.
Bari baherekejwe n’indege y’ubufasha y’abapilote babigize umwuga, ari nayo yakoze impanuka kuri uyu wa gatandatu irimo Des Werner na Werner Froneman.
Urugendo rw’indege y’aba bana rugeze mu gice cya Afurika yo hagati bava i Cairo basubira i Cape muri Afurika yEpfo aho bahagurukiye.
