Nyuma y’uko Ubushinjacyaha bujuririye icyemezo cy’urukiko rwisumbuye rwa Nyarugenge , kigira umwere Ishimwe Dieudonne uzwi nka Prince Kid, tariki 10 Werurwe 2023 nibwo azasubira mu rukiko.
Me Nyembo Emelyne niwe wemeje ko umukiriya we azaburana kuri iyi tariki nyuma y’uko Urukiko rwisumbuye rwa Nyarugengenge rumugize umwere tariki 2 Kuboza 2022 ku byaha yashinjwaga birimo ibya ruswa ndetse n’iby’ihohotera rishingiye ku gitsina.
Urukiko rumurekura rwashigiye ko ibimenyetso Ubushinjacyaha ndetse n’abatangabuhamya batanze bidahagije ngo akomeze gufungwa.
Mbere y’isomwa ry’uru rubanza rwe nta kizere cyari gihari ko atari bukatirwe igifungo, kuko ubushinjacyaha bwari bwamusabiye gufungwa imyaka 16.
Kuva uru rubanza rwatangira kuburanishwa rwashyizwe mu muhezo ndetse n’abatangabuhamya nta wigeze agaragara mu ruhame n’ubwo Prince Kid we, atahwemaga kubisaba.
Ishimwe Dieudonné yatawe muri yombi tariki 25 Mata 2022 n’Urwego rw’Igihugu rw’Ubugenzacyaha (RIB), atangira gukorwaho iperereza ku byaha bya ruswa ndetse n’iby’ihohotera rishingiye ku gitsina, byavugwaga mu irushanwa rya Miss Rwanda.
