Umuyobozi Mukuru w’Ikigo cy’ Igihugu cy’Ubuzima mu Rwanda RBC, Dr. Nsanzimana Sabin, yatangaje ko abantu 400 bari barakingiwe icyorezo cya Covid-19u Rwanda bongee kugaragaraho iki cyorezo , asaba abakingiwe kugira amakenga.
Nsanzimana yavuze ko kuba hari abahawe inkingo ariko bakandura Covid-19, bikwiye kubera isomo rikomeye abakomeje kurenga ku mabwiriza yo kwirinda bitwaza ko bahawe inking z’iki cyorezo.
Yagize ati “Kuba dufite abantu 400 banduye Covid-19 ariko barigeze gufata ku rukingo, biratanga ubutumwa bubiri, ubwa mbere ni uko gukingirwa bitakubuza kwandura. Ikindi ni uko iyo wamaze gufata urukingo uba ufite inshingano zo kwirinda kuba ikiraro kugira ngo Covid-19 ikuveho ijye ku wundi. Uwakingiwe rero ashobora kwanduza, ibyo turabibona mu mibare dufite.”
Mu mpera z’icyumweru gishize, Minisitiri w’Ubuzima, Dr. Ngamije Daniel, yari yavuze ko mu Rwanda hari abantu bahawe urukingo ariko bakaza kwandura Covid-19, gusa avuga ko batarembye.
Yaragize ati “Icyagaragaye ni uko abenshi bakingiwe batarwara kuko hari [inkingo] zifite 95% by’ubushobozi bwo kurinda umuntu wakingiwe n’uwanduye mu bakingiwe kuko birashoboka.”
Yarakomeje ati “Haboneka bake cyane, icyiza ni uko iyo babonetse ntabwo baremba, nta bimenyetso mu by’ukuri baba bafite, uramupima ukabona ko yanduye, afite Covid-19, ariko nta bimenyetso bijyanye no kurwara aba afite ku buryo byamuviramo no gupfa. Ibyo rwose nta bihari ku bantu bakingiwe, ni imwe mu ngaruka nziza zo gukingirwa.”
