Amb. Gen Patrick Nyamvumba yashyikirije Minisitiri w’Ububanyi n’Amahanga wa Tanzania, Amb. Mahmoud Thabit Kombo, kopi z’impapuro zimwemerera guhagararira u Rwanda muri iki gihugu.
Ni umuhango wabaye kuri wa Mbere tariki 5 Kanama 2024, nk’uko Ambasade y’u Rwanda muri Tanzania yabitangaje.
Uretse kopi, biteganyijwe ko Nyamvumba agomba gushyikiriza Perezida wa Tanzania, Samia Suluhu Hassan, umwimerere w’izi mpapuro zimwemerera guhagararira u Rwanda.
Inama y’Abaminisitiri yateranye ku wa Kabiri tariki 27 Gashyantare 2024 iyobowe na Perezida Kagame, ni yo yagennye ko Nyamvumba aba Ambasaderi w’u Rwanda muri Tanzania, asimbura Fatou Harerimana.
Muri Nyakanga 2024, Inteko Rusange ya Sena y’u Rwanda yemeje bidasubirwaho ko Gen Patrick Nyamvumba yujuje ibisabwa bituma yakora izi nshingano neza.
