Leta zunze ubumwe za Amerika zivuga ko zoherereje u Rwanda doze hafi 500,000 z’urukingo rwa Pfizer zirimo icyiciro cya mbere cya doze miliyoni 500 ubutegetsi bwa Joe Biden bwemeye gutanga ku isi, nk’uko byatangajwe n’ibiro bya perezida wa Amerika.
Kuri Twitter, Kevin Munoz, umuvugizi wungirije wa White House, yatangaje ko ku wa kabiri Amerika yohereje mu Rwanda doze 488,000 z’urukingo rwa Pfizer. Abategetsi mu Rwanda ntibaremeza niba izi nkingo zahageze.
Ibi ni igikorwa kiri mu bufasha ubutegetsi bwa Biden bwemereye gahunda ya COVAX igamije kugeza inkingo za Covid-19 mu bihugu bikennye.
Abasesenguzi banenga ibihugu bikize kwigwizaho inkingo no kuzingingira abaturage babyo batazishaka, mu gihe mu bihugu bikennye gahunda zo gukingira Covid zikiri inyuma cyane kubera ubucye bw’inkingo.
Mu kwezi kwa gatandatu, Perezida Biden yavuze ko Amerika izatanga ku isi doze miliyoni 500 za Pfizer, abategetsi bavuze ko zizatangira koherezwa mu bihugu mu mpera z’uku kwezi kwa munani.
U Rwanda rumaze gukingira hafi miliyoni y’abantu kuva rwatangira gahunda zo gukingira mu kwezi kwa kabiri uyu mwaka.
Mu kwezi gushize kwa karindwi, iki cyorezo ni bwo cyazahaje u Rwanda aho imibare y’abandura bashya yageze ku kigereranyo gisatira 1,000 ku munsi.
Nyuma y’ingamba za ‘guma mu rugo’ zafashwe, ikigereranyo cy’abandura ubu kigeze kuri 584 ku munsi, nk’uko bitangazwa na Minisiteri y’ubuzima mu Rwanda.
Muri ‘weekend’ ishize, Dr Sabin Nsanzimana ukuriye ikigo cy’u Rwanda cy’ubuzima, yabwiye televiziyo y’u Rwanda ko “hafi kimwe cya kabiri cy’abagombaga gukingirwa mu mujyi wa Kigali bakingiwe”.
Dr Nsanzimana yavuze ko mu gihugu hose igipimo cyo gukingirwa kigeze ku 10% kandi hari icyizere ko gukingira nibikomeza, umwaka utaha ubuzima bushobora gusubira nka mbere.
