Umunyamakuru Andrew Mwenda, uherutse gutangazwa na General Muhoozi Kainerugaba ko amugize Umuvugizi we, yatangiye kumuvuga imyato, ko agira ikinyabupfura gihebuje.
Mu cyumweru gishize, General Muhoozi yatangaje ko agize Andrew Mwenda umuvugizi we.
Kuri ubu, Andrew Mwenda wumvikanye asa nk’uwatangiye inshingano, yavuze ibigwi uyu musirikare w’Umujenerali.
Andrew Mwenda yagize ati “Muhoozi ni umuntu uzi kumva, afite ubuhanga mu kwisanzurana n’abantu. Ikindi kandi Muhoozi ntabwo aganzwa n’amarangamutima. Afite ikinyabupfura kandi akaba yubaha bihebuje ubuyobozi.”
Uyu munyamakuru akomeza avuga ko intego ya Muhoozi atari ukujya ku butegetsi ahubwo ko agamije kugeza Uganda ku bintu byiza. Ati “Kandi hari uburyo bwinshi yabigeraho.”
Andrew Mwenda kandi yagarutse ku byo kuba Muhoozi ari gushaka kuzasimbura se ku butegetsi, avuga ko adashobora guhangana na we.
Ati “General Muhoozi ntabwo ahanganye na Se. nta n’ubwo ahanganye na Besigye. Nta n’ubwo ahanganye na Bobi Wine. General Muhoozi ni impano twavuga ko ari Uganda nshya dukeneye.”
Andrew Mwenda na Muhoozi, mu kwezi k’Ukwakira umwaka ushize wa 2022, bari bazanye mu Rwanda, aho banakiriwe na Perezida Paul Kagame akanagabira inka uyu Munyamakuru.
RWANDATRIBUNE.COM
