Mu gitondo cyo kuri uyu wa Gatanu tariki ya 5 Werurwe 2021 ku bitaro 50 n’ibigonderabuzima 508 hatangiye igikorwa cyo gukingira Covid-19 ku bantu bashobora kw’ibasirwa n’iki cyorezo.
Ni igikorwa kibaye gikurikira icyabaye ku wa 04 Werurwe 2021 cyo kugeza inkingo mu duce twose tuzakingirirwamo hifashishijwe indege za gisirikare n’imidoka z’ibitaro.
Mu cyiciro cya mbere cyo kubona inkingo , u Rwanda rwakiriye inkingo zirenga 300,000 zo mu bwoko bwa Oxford-AstraZeneca na Pfizer zo muri gahunda ya Covax ihuriweho n’ibihugu binyuranye bya Afurika.
Ku bitaro bya Kabgayi umwe mu baganga utifuje gutangazwa amaze gukingirwa yabwiye BBC ati: “Ndishimye ko banteye urukingo, ariko ni doze ya mbere kandi hakenerwa ebyiri, n’ubundi ndakomeza kwirinda uko bisanzwe”.
Nubwo bamwe bavuga gutya ariko, Ku bitaro bya Ruhengeri hari abakingiwe bafite impungenge ko izi nkingo zishoora kubagiraho ngaruka bityo bakibaza uwo byabazwa mu gihe koko izi nkingo zaba zibagize ingaruka . Umwe muri yabwiye BBC ati”Bararunteye numva rwose biranshimishije, gusa twese turacyibaza ngo ‘mu gihe haba ingaruka mbi ziruvuyeho ni inde uzabibazwa?'”.
Mu kwezi gushize, mu buryo butatanzweho amakuru arambuye, hari umubare w’abantu barimo abaganga n’abategetsi bakuru bakingiwe hakoreshejwe “inkingo nkeya zabonetse ku bufatanye mpuzamahanga”, nk’uko minisiteri y’ubuzima yabivuze.
Mu gitondo cyo kuri uyu wa gatanu, minisitiri w’ububanyi n’amahanga Vincent Biruta yatangaje ko yakiriye izindi doze 50,000 z’impano y’inkingo leta y’Ubuhinde yahaye iy’u Rwanda.
Mu Rwanda, abantu barenga 19,000 banduye Covid-19 naho abagera kuri 266 imaze kubica, nk’uko bitangazwa na minisiteri y’ubuzima.
Minisitiri w’ubuzima mu Rwanda yatangaje ko bafite intego yo gukingira 30% by’abaturage muri uyu mwaka na 60% mbere y’uko 2022 irangira.
