Mu ijoro ryo kuri uyu wa gatandatu muri Kigali Arena habereye umukino wa 7 wahuje aya makipe yombi hagamijwe kureba itsindamo imikino 4 maze igahabwa igikombe uburyo buzwi nka Playoffs.
Ikipe ya Patriots yegukanye intsinzi nyuma yo gutsinda REG BBC amanota 65-59 mu mukino wa Karindwi, biba intsinzi ya 4 mu mikino 7 aya makipe yombi yahuye maze yisubiza iki gikombe ndetse inabona itike yo guhagararira u Rwanda mu irushanwa rya Basketball Africa League (BAL).
Agace ka mbere k’uyu mukino karangiye amakipe yombi anganya amanota 10-10 mu gihe hatangiye kugaragara ikinyuranyo cyane ubwo abakinnyi ba REG BBC batakazaga imipira myinshi n’iyo bagerageje gushyira mu nkangara ikifatirwa n’abakinnyi ba Patriots BBC.
Mu gace ka kabiri karangiye Patriots BBC yasize cyane REG iyirusha amanota 12 kuko karangiye ari amanota 35 kuri 23.
Mu gace ka gatatu ikipe ya REG yagerageje gihindura umukino ngo igende imbere ya Patriots ariko biranga kuko aka gace kaje kurangira ari 48 ya Patriots kuri 42 ya REG.
REG BBC yakinnye neza mu gace ka nyuma, yotsa igitutu Patriots BBC kugeza ubwo hasigayemo ikinyuranyo cy’amanota abiri gusa mu masegonda 35 ya nyuma (61-59) ariko biba iby’ubusa kuko amakipe yombi yatsinzemo amanota 17 bityo biba bifashije Patriots gusoza umukino harimo ikinyuranyo cy’amanota atandatu (65-59).
Umukino ubanza Patriots yatsinze REG amanota 67-58 ubwo umukuru w’igihugu yatahaga ikibuga cy’imikino cya Kigali Arena.
Imikino 3 ikurikiyeho yabereye muri Petit Stade maze REG ibona insinzi 3 zikurikiranya amanota 66-65, 64-59, ndetse na 63-62 bityo REG iyoborana insinzi 3 kuri 1 za Patriots.
Mbere y’umukino wa 5 ikipe ya REG yasabwaga gitsinda umukino umwe igakora amateka ariko Patriots ntiyayikundira kuko uyu mukino REG yaje kuwutakaza itsinzwe na Patriots amanota 69-61bityo berekeza ku mukino wa 6 wabaye kuri uyu wa gatanu nawo ikipe ya Patriots iwutsindamo REG 78-60, bityo amakipe yombi ahurira mu mukino wa kamarampaka nyuma y’uko Patriots BBC iturutse inyuma ikishyura REG BBC bakanganya imikino 3-3.
Hakorimana Christian
