Nyuma yuko mu mpera z’icyumweru gishize, habaye impinduka muri Guverinoma y’u Rwanda zigatyma Beata Habyarimana asimbuzwa ku mwanya wa Minisitiri w’Ubucuruzi n’Inganda, yahise agirwa umuyobozi wa BK Group PLC.
Izi mpinduka zakozwe ku wa Gatandatu w’icyumweru gishize tariki 30 Nyakanga 2022, aho Perezida Paul Kagame yagize Dr Jean Chrysostome Ngabitsinze, Minisitiri w’Ubucuruzi n’Inganda.
Ni umwanya yasimbuyeho Beata Uwamaliza Habyarimana wari umaze umwaka n’igice ari Minisitiri w’Ubucuruzi n’Inganda.
Kuri uyu wa Mbere tariki 01 Kanama 2022, ubuyobozi bwa BK Group PLC bwasohoye itangazo rivuga ko Beata Uwamaliza Habyarimana yagizwe Umuyobozi Mukuru w’iyi sosiyete isanzwe ibarizwamo ibigo binyuranye birimo na Banki ya Kigali.
Marc Holtzman usanzwe ari Umuyobozi w’inama y’ubutegetsi ya BK Group PLC, yavuze ko biteze kuri byinshi Beata Uwamaliza Habyarimana wagizwe Umuyobozi Mukuru w’iyi sosiyete ya BK Group PLC.
Yagize ati “Imiyoborere ye n’ubunararibonye bwagutse mu rwego rw’imari bizaba imvumba yo kwihutisha intego yacu.”
RWANDATRIBUNE.COM
