Ku myaka 44 y’amavuko, umuhanzi ukomoka mu gihugu cy’Uburundi witwa Willy Léonard Niyomwungere wakunzwe cyane mu Rwanda no mu Burundi kubera indirimbo ye yise “Abantu”, yahitanwe n’icyorezo cya Covid-19.
Uyu muhanzi yaguye mu gihugu cya Malawi kuri uyu wa Gatandatu nkuko Ikinyamakuru Malawi24 ducyesha iyi nkuru cyabitangaje, aho abaye umuntu wambere ukomoka mu gihugu cy’Uburundi uhitanywe n’icyorezo cya Coronavirus.
Niyomwungere wageze muri Malawi kuwa 28 Werurwe 2020 avuye mu gihugu cya Canada aho yari atuye, yasuzumwe kuwa Gatanu w’iki cyumweru bamusangana Coronavirus yanahise imwivugana.
Biravugwa ko uyu muhanzi yari kumwe n’umugore we n’undi muntu wo mu bagize umuryango we bapimwe nabo basanganwa Coronavirus kuri uyu wa Gatandatu.
Niyomwungere Leonard yitabye Imana afite abana babiri b’abakobwa yasize muri Canada, mu gihe umugore we arwariye Covid-19 muri Malawi aho yari kumwe n’umugabo we.
Amakuru aravuga ko Minisiteri y’Ubuzima mu gihugu cya Malawi iri gushaka abo Willy Léonard Niyomwungere yahuye nabo gusa ni benshi cyane kuko ngo nyuma yo kurwara yagiye yerekeza ku bitaro bitandukanye yivuza ndetse ngo yagendaga muri Bisi rusange ariyo mpamvu bikekwa ko ashobora kuba yaranduje abantu benshi.
Mu Burundi, uyu mugoroba minisiteri y’ubuzima yatangaje ko habonetse abantu babiri bashya banduye Covid-19, umubare w’abayanduye ubu ni batanu (5).
Kugeza magingo aya, ubu abamaze kwandura iki cyorezo ku isi yose ni 1,777,666, abamaze guhitanwa nayo ni 108,867 mu gihe abamaze gukira ari 404,372.
Kugeza ku mugoroba wo kuri uyu wa gatandatu, ishami rishinzwe kurwanya ibyorezo mu muryango w’Ubumwe bwa Africa rivuga ko abanduye iki cyorezo muri Africa ari 13,145. Iri shami rivuga ko imaze kwica abantu 700 naho 2,171 bayikize.
Ibihugu iki cyorezo kitarabonekamo muri Africa kugeza ubu ni Lesotho n’ibirwa bya Comores.
Muri aka karere uko abayanduye muri DR Congo – 223, Kenya – 191, Rwanda – 120, Uganda – 53, Tanzania – 32, Burundi – 5, South Sudan – 4
Yanditswe na Ndacyayisenga Jerome
