Abagize inteko Ishingamategeko ya Leta Zunze Ubumwe za Amerika bemeje ko barimo gukusanya ibimenyetso bizahabwa ubushinjacyaha ku ruhare rwa Trump mu myigaragambyo iherutse kubera imbere y’ingoro inteko ishingamategeko ya Amerika (Capitol) ikoreramo.
BBC ivuga ko itsindinda rihuriwemo n’abagize inteko ishingamategeko bo ku ruhande rwa Trump (Republican) n’uruhande rw’abademokarate(Democrats) bemeje ko bari gukusanya ibimenyetso bizashyikirizwa ubutabera bitarenze muri Gashyantare uyu mwaka , aho bemeza ko Donald Trump agomba kuba yagejejwe imbere y’inkiko muri uko kwezi.
Donald Trump ashinjwa kuba yaragize uruhare mu gukangurira abaturage gukora imyigaragambyo yo kuwa 6 Mutarama 2021, aho abiganjemo abo mu ishyaka ry’Abarepubulikani bigabije imihanda yerekeza ku ngoro y’inteko ishingamategeko(Capitol) bamagana ibyavuye mu matora byari bimaze kwemeza ko Joe Biden yatorewe kuyobora Leta zunze ubumwe za Amerika.
Si ubwa mbere inteko ishingamategeko ya Amerika cyane ku ruhande rw’abademokarate bagerageza kugeza Trump imbere y’ubutabera, kuko no mu mwaka ushize Trump yasabwe gukurikiranwa ku cyaha cyo kugambana na Perezida wa Ukraine Volodymyr Zelensky bagamije guharabika Joe Biden n’umuhungu we , ubwo yari amaze kwemezwa nk’uzahagararira ishyaka ry’aba Democrat mu matora y’umukuru w’igihugu yo muri 2020.
Ildephonse Dusabe
