Perezida wa RDC Antoine Felix Tshisekedi ari kwiyamamariza kongera kuyobora manda ya kabiri aho ahanganye na Moise Katumbi. Kuri ubu aba bakandida babiri bahabwa amahirwe kurusha abandi mu matora ya perezida wa Congo none ku wa 13 Ugushyingo 2023 bombi bagomba kwiyamamariza mu mujyi wa Kananga mu Ntara ya Kasaï-Central.
Guverineri w’iyi ntara yasohoye itangazo rivuga ko ubuyobozi bwayo bwafashe ingamba z’umutekano mu kurinda abo bakandida bombi cyangwa gukumira ibikorwa by’urugomo.
Muri izo ngamba harimo ko abo bakandida biyamamariza ahantu hategeranye muri uyu mujyi kandi ko bawugeramo mu masaha atandukanye.
Radio Okapi ivuga ko umukandida Moïse Katumbi agomba kuhagera ahagana saa saba naho Tshisekedi akahagera nimugoroba.
Ni bwo bwa mbere aba bakandida bahanganye bari bwiyamamarize mu mujyi umwe ku munsi umwe.
Urugomo mu bikorwa byo kwiyamamaza rwagiye rwibasira ibikorwa by’umukandida Katumbi, uruheruka ni urwabaye kuri uyu wa kabiri i Muanda mu ntara ya Kongo Central.
Itangazo ryasohowe na guverineri wa Congo Central rivuga ko habaye gushyamirana kw’abantu bo murindi shyaka n’abashinzwe umutekano w’umukandida Katumbi.
Iryo tangazo rivuga ko abarinda uyu mukandida ari bo barashe amasasu bakoresheje imbunda zabo mu gushwiragiza abo bahanganye, polisi nayo igakoresha imyuka iryana mu maso mu gutatanya abahanganye.
Iri tangazo rivuga ko hari abantu bakomeretse, barimo abakomeretse bikomeye, gusa ntirivuga umubare wabo.
Umuvugizi wa leta, Patrick Muyaya, yatangaje ku rubuga X ko “guhungabanya kose imigendekere myiza y’ibikorwa by’amatora ntikuzihanganirwa”, asaba amashyaka n’abakandida kugira imyifatire ikomeza ituze muri rubanda.
Moïse Katumbi niwe mukandida rukumbi biboneka ko ahanganye cyane na Felix Tshisekedi ushaka manda ya kabiri.
UMUTESI Jessica
Rwandatribune.com
