Rugema Kayumba yanyomoje invugo ya RNC kuri dosiye ya Ben Rutabana ni ya Mudathiru ufungiye mu Rwanda,ndetse anahishyura ko azi neza aho Ben Rutabana aherereye.
Mu kiganiro cyahise kuri uyu mugoroba taliki ya 08 Ukwakira 2019 kuri Radio Inkingi, Rugema Kayumba yabereye umutumirwa, yabajijwe ku rubanza rw’abarwanashyaka 25 ba RNC batangiye kuburanishwa mu rukiko rwa gisilikare rwa Nyamirambo, barangajwe imbere na Maj rtd Mudathiru Habibu.
Yagize ati: Mudasiru kimwe n’abagenzi be babaga mu nkambi z’impunzi za Uganda, nyuma babonye akarengane gakomeje kuba ku mpunzi muri Uganda bagana P5, barisunganya begura intwaro ati; bariya n’ibitambo bya politiki nta mpamvu twabihakana.
Ku kibazo cy’ibura rya Ben Rutabana yagize ati: nkuko nabitangaje ku rukuta rwanjye rwa facebook aho Rutabana ari harazwi, yagiye gutangiza urugamba rwo kubohoza u Rwanda
itangazo Rugema yasize ku rukuta rwe rwa facebook rihabanye kure n’ibaruwa Bwana Nayigiziki Umuhuzabikorwa wa RNC yasubije umuryango wa Ben Rutabana ko batazi irengero rye.
Ku rundi ruhande byaba Ari igitangaza Rugema Kayumba n’umurwanashyaka muto azi neza aho Ben Rutabana ari, umuryango ndetse n’ishyaka rye.
Tugarutse ku rubanza rwa Maj rtd Habibu Mudasiru na bagenzi be, Jean Turayishimiye Umuvugizi wa RNC yahakanye ko bariya bantu atari aba RNC, abakurikiranira hafi bavuga ko Ben Rutabana ari nawe wari ukuriye igice cy’ingabo za RNC cyiswe PLAN B, akaba yarari mu bikorwa byo gushinga umutwe w’ingabo wunganira ibikorwa bya gisilikare bya RNC biri muri RUDI URUNANA.
Uyu mushinga wa Ben Rutabana, Kayumba Nyamwasa akaba atarawukozwaga kuko Rutabana yari amaze guhigika ku ruhande FRANK Ntwari na Sande Mugisha Rachid abavuga rikijyana kwa Kayumba Nyamwasa,mu byazira bikaba biri muri byo.
Twabibutsako Rugema Kayumba ari umwe mu barwanashyaka bakomeye ba RNC birirwa batuka Leta y’ubumwe bw’abanyarwanda ku mbuga nkoranyambaga, Rugema Kayumba akaba ari umwambari w’urwego rw’ubutasi rwa Uganda CMI, akaba yaragize uruhare runini mu ishimutwa ry’abanyarwanda baba muri Uganda.
Ubu akaba ari Umuhuzabikorwa wa RNC mu gihugu cya Noruveje.
Mwizerwa Ally
