Muri weekend ishize amashyaka atatu yatangaje abakandida bayo mu matora ya perezida w’u Burundi ateganyijwe mu kwezi kwa gatanu 2020, abakandida bose hamwe bamaze kuba 10.
Gaston Sindimwo ni umukandida wa Uprona akaba asanzwe ari visi perezida w’u Burundi, Jacques Bigirimana w’ishyaka FNL na Anicet Niyonkuru wa CDP.
Aba baje biyongera ku bakandida babiri bigenga aribo Francis Rohero n’umupasiteri Dieudonné Nahimana.
Léonce Ngendakumana wa FRODEBU, Kassim Abdul wa UPD Zigamibanga, Keffa Nibizi wa Sahwanya FRODEBU Nyakuri, Fidélité Nibigira wa APDR na Gen Maj Evariste Ndayishimiye wa CNDD-FDD nabo biongera kuri rutonde rw’abahatanira kuobora igihugu c’u Burundi.
Ishyaka ritavuga rumwe n’ubutegetsi rifatwa nka rimwe mu akomeye mu gihugu Congrès National pour la Liberté (CNL) riyobowe na Agathon Rwasa, ni nawe uzarihagararira mu matora.
Iri shyaka rimaze igihe rivuga ko abanywanyi baryo bakorerwa ibikorwa by’ihohoterwa bigamije kubaca intege mu gihe igihugu kigiye kwinjira mu matora.
Bwana Jacques Bigirimana watanzwe n’ishyaka Force National de Liberation (FNL) – ishyaka rifatwa nk’irishyigikiye iriri ku butegetsi ubusanzwe ni umuyobozi waryo akaba n’umuyobozi wa “Office du The du Burundi” (OTB).
Anicet Niyonkuru uyobora ishyaka Conseil Des Patriotes, CDP, ugiye kwiyamamaza, yahoze ari umunyamabanga w’ihuriro ry’abanyapolitiki n’amashyaka atavuga rumwe n’ubutegetsi CNARED rikorera mu burayi.
Mu kwezi kwa munani 2019 Niyonkuru yabwiye BBC ko bafite ishyaka ryo gutaha bakajya mu matora n’ubwo ibintu bitaragenda neza ndetse nta kinini cyahindutse mu Burundi.
Yagize ati: “Abatavuga rumwe na leta baracyahohoterwa, impunzi nyinshi ziracyari mu buhundiro kandi tukabona ko amatora bamaze kuyategura nta kizayabuza kuba, tukagira tuti abanywanyi bacu ntibakwiye gutora uwo badashaka”.
Mu kwezi kwa cumi 2019 Bwana Niyonkuru na bamwe mu bandi bari mu ihuriro CNARED batashye mu Burundi.
Fidélité Nibigira wa APDR, niwe mugore wenyine umaze gutangaza ko ashaka guhatanira uyu mwanya wo gutegeka u Burundi, ni nawe watangajwe mbere y’abandi nk’umukandida n’ishyaka rye.
Umukandida w’ishyaka riri ku butegetsi niwe uhabwa amahirwe yo gutsinda amatora, byemezwa kandi na Johnson Shikwati umwarimu w’imiyoborere (governance) muri Kaminuza zo muri Kenya.
Bwana Shikwati agira ati: “Iyo urebye uko kwemeza umukandida wa CNDD-FDD byari bitegerejwe, bikwereka uwari utegerejwe uwo ari we, agomba kuba ari we musimbura wa Perezida Nkurunziza”.
Gusa uyu mwarimu yemeza ko n’umuntu nka Agathon Rwasa mu gihe yakwemezwa n’ishyaka rye, CNL, nk’umukandida, ashobora kuba umwe mu bahabwa amahirwe menshi.
Amatora y’umukuru w’igihugu mu Burundi ateganyijwe tariki 20 Gicurasi 2020.
HABUMUGISHA vincent.
