Mu mpera z’icyumweru gishize Minisitiri w’ubuzima mu gihugu cy’u Burundi Dr. Thaddée Ndikumana,yashize hanze raporo igaragaza uko icyorerezo cya coronavirus cyifashe mu gihugu cy’u Burundi kuva muri Werurwe 2020 ubwo hagaragara umuntu wa mbere wanduye kugeza magingo aya.
Minisitiri w’ubuzima avuga ko abantu basaga 18 aribo baheruka kugaragaraho ubwandu bwa covid-19 hagati y’amatariki ya 9 na 15 ugushingo. Akomeza avugako mw’abo 18 baheruka gutahurwaho ubu bwandu abasaga 14 baje baturuka hanze y’u Burundi naho abandi 4 bakaba bari basanzwe baba imbere mu gihugu.
Avuga ko guhera muri Werurwe 2020 ,mu bipimo byafashwe ku bantu basaga 58677 abagera kuri 630 nibo bagaragayeho ubwandu bwa Covid-19. Aha mu Burundi kandi mu bantu 630 bamaze kugaragaraho ubwandu bwa Covid-19 abagera kuri 177 bayikuye hanze y’u Burundi naho abagera kuri 453 bakaba barayanduriye imbere mu gihugu binyuze muburyo bwo kuyihererekanya.
Muri iyi Raporo Minisitiri akomeza avuga ko abantu bagera 35 basanzwe bakora mu nzego zita k’ubuzima bw’abantu nabo basanzwemo icyorezo cya Coronavirus.Mu bantu 630 basanzwemo Covid-19 kuva muri Werurwe 2020 kugeza mw’uku kwezi ku Ugushyingo abagera kuri 575 baravuwe barakira naho abandi 54 bakaba bakiri kwitabwaho n’abaganga, mugihe umuntu 1 ariwe umajize guhitanwa n’iki cyorezo.
Abanduye covid-19 bagaragaye mu ntara 14 kuri 18 zigize igihugu cy’uBurundi.Intara zibasiwe cyane akaba ari Intara ya Muramvya,Mwaro, Bururi na Rutana.Abanduye benshi ngo bakaba bari hagati y’imyaka 25 na 59 y’amavuko nk’uko Minisiteri y’Ubuzima ibitangaza.
Leta y’u Burundi ikaba yarafashe ingamba zo kurwanya Covid-19 zirimo gushiraho uburyo bwo gupima covid-19 mu bitaro byose , kongera imbaraga mu kugenzura urujya n’uruza rw’abantu bambukiranya imipaka n’ikibuga mpuzamahanga cya Bujumbura.
Hategekimana Claude
