Ishyaka ritavuga rumwe n’ubutegetsi bwa Leta y’u Burundi, CNL, ryasohoye itangazo aho rivuga ko abarwanashyaka baryo bafatwa mu buryo butumvikana nyuma y’ibitero biheruka i Muramvya n’Imwaro.
Itsinda ry’abantu bataramenyekana bagabye ibitero mu kwezi gushize kwa 6 n’ukwa 5 mu ntara za Muramva na Mwaro, ibitero byibasiye imodoka z’abenegehugu hapfa abantu batari bake.
Abashinzwe umutekano mu Burundi bavuze ko hari n’abafashwe mu bakekwaho kugaba ibyo bitero.
Muri iryo tanzangazo, ishyaka CLN rivuga ko ritewe impungenge n’uko abafatwa bisa nk’uko bahorwa ko bari muri iri shyaka kandi mu baza kubafata hakaba harimo n’abanyagihugu basanzwe. Iri shyaka rivuga ko abarwanashyaka baryo 27 aribo bamaze gufatwa.
Umuvugizi wa CNL, Manirambona Therence, yabwiye BBC dukesha iyi nkuru ati: “Nk’ibi byabaye mu Rutegama, abashinzwe umutekano batubwiye ko abagabye ibitero bateze imodoka saa mbiri z’ijoro ariko ngo nyuma y’isaha imwe abarwanashyaka umunani (8) b’ishyaka CNL bari bamaze gufatwa.
Bwana Manirambona yakomeje avuga ko hari igihe baza bagafata umuryango wose, umugabo, umugore n’umwana w’imyaka itatu, akibaza icyo babaza umwana ungana gutyo mu iperereza.
Yongeyeko ko itangazo CNL yasohoye ryari rigamije kandi kwiyama ubwicanyi bwahitanye inzirakarengane, ngo kuko mu biciwe muri ibyo bitero harimwo n’abarwanashyaka b’ishyaka CNL.
Si ubwa mbere ishyaka CNL rivuga ko abarwanashyaka baryo bafatwa ku mpamvu za politike, mu mwaka ushize mu gihe cy’amatora hakaba harafashwe abarwanashyaka benshi b’iri shyaka. Abashinzwe umutekano icyo gihe bavuze ko abafatwa bose haba hari icyo bacyekwaho ngo ntibahorwa ishyaka.
Eric Bertrand Nkundiye
