Amakuru aturuka mu gihugu cy’u Burundi aravuga urupfu rw’Umusirikare witwa Leonard Bucumi, wahoze no mu gisirikare cya kera (Ex-FAB) bivugwa ko yapfuye mu buryo bw’amayobera kuri uyu wa Mbere tariki 13 Mutarama, ariko bikaba bikekwa ko yishwe n’abasirikare bagenzi be.
Umurambo wa Caporal-chef Leonard Bucumi wasanzwe mu ishyamba rya Rukoko, ugaragaza ibikomere ku nda, mu gituza no mu mugongo.
Abantu babonye uyu murambo ku ikubitiro bavuga ko yishwe n’inyamanswa, ariko bamwe muri bagenzi be b’abasirikare batangira kubishidikanyaho bibaza ukuntu yari yageze muri iryo shyamba wenyine kandi atari no mu kazi.
Amakuru agera kuri RPA dukesha iyi nkuru, avuga ko Cpl Bucumi yari yirirwanye na bagenzi be bica akanyota mu kabari gaherereye mu gace ka Kagaragara, ko muri Zone Buringa, yo mu Ntara ya Bubanza. Amakuru aturuka muri bamwe mu basirikare agera kuri iki kinyamakuru akaba avuga ko Bucumi yishwe hagakekwa bagenzi be Cpl Jean-Marie Ndizeye na Cpl Pierre Miburo.
Ayo makuru akaba avuga ko aba basirikare baba barishe mugenzi wabo ku mabwiriza ya Capt. Francois Niyonkuru. Uyu n’abo basirikare bakekwaho ubwicanyi bose babarizwa mu kigo cya DCEA kimwe na Bucumi, aho bose bakoreraga ku birindiro bya gisirikare bya Kagaragara biyoborwa n’uyu Capt. Niyonkuru.
Amakuru avuga ko Cpl Bucumi yari amaze amezi abiri akubutse mu butumwa muri Somalia. Bivugwa ko yabarizwaga mu bwoko bw’Abatutsi akaba akomoka ahitwa Mparamirundi, muri Komini Busiga, mu Ntara ya Ngozi.
Abo basirikare bakekwaho kumwica babiri bo ni Abahutu, bahoze ari inyeshyamba, naho Capt Niyonkuru we ngo akaba ari Umututsi ariko nawe wahoze mu nyeshyamba za FDD.
Iki kinyamakuru dukesha iyi nkuru kivuga ko cyagerageje kuvugisha Col. Floribert Biyereke, umuvugizi w’Igisirikare cy’u Burundi, ariko telephone ye ikaba yacagamo ariko ntayitabe.
Abasirikare b’u Burundi bakomeje gupfa mu mayobera abandi bakabura
Mu mpera z’umwaka ushize ni bwo hagaragaye umurambo wa Cpl Tharcisse Macumi, wabarizwaga mu mutwe ushinzwe kurinda umukuru w’igihugu, aho byavugwaga ko yishwe arimo kugerageza kwirwanaho yatewe n’abajura, mu gihe umuryango uharanira uburenganzira bwa muntu, FOCODE , wavuze ko umurambo we wabonetse umanitse mu giti nyuma y’iminsi ibiri aburiwe irengero.
Hadaciye kabiri, Cpl Rénovat Ndayiragije, ubarizwa mu bashinzwe kurinda umugaba mukuru w’ingabo yaburiwe irengero, ubwo yari agiye mu karuhuko iwabo muri Komini Ruyigi.
HABUMUGISHA Vincent
